Mál­verk af Græn­landi undir stjórn Trumps vekur at­hygli

Verkið heitir „Trump í Nuuk“. Listmálarinn er Anders Kelstrup og býr í bænum Holbæk á Sjálandi vestur af Kaupmannahöfn. Anders veitti fréttastofu góðfúslegt leyfi til að birta myndina og að vitna í heimasíðu hans þar sem hann lýsir verkinu.

Aðalfréttaritari The Wall Street Journal í utanríkismálum, Yaroslav Trofimov, vísar til myndarinnar um leið og hann fylgir ítarlegri grein sinni um Grænland úr hlaði með þeim orðum að þrýstingur Trumps á að innlima Grænland gangi illa. Trump ýti Grænlendingum nær Danmörku þrátt fyrir sjálfstæðisþrá þeirra og gremju í garð Dana.

„Veggspjald sem var til sölu á staðnum sýndi skopmynd af lífinu á Grænlandi undir bandarískri stjórn. Það sýndi glænýjan Trump-turn í höfuðstaðnum Nuuk og vopnaða menn með rauðar MAGA-húfur sem keyrðu um á Tesla-bílum. Grænlendingarnir voru myndaðir á bak við gaddavír á verndarsvæði, þar sem ferðamenn voru rukkaðir um 200 dollara fyrir að heimsækja þá,“ segir fréttaritari Wall Street Journal.

Listmálarinn Anders Kelstrup segir að nýleg yfirlýsing Donalds Trump um að Bandaríkin vilji taka yfir Grænland, og með vopnavaldi ef nauðsyn krefði, hafi verið innblástur að gerð myndarinnar. Hún horfi yfir Nuuk með fjallið Sermitsiaq handan fjarðar.

„Málverkið sýnir nokkrar af merkustu byggingum bæjarins og minnisvarða. Trump sé þegar lentur á stóru, fallegu flugvélinni sinni. Hann hafi byggt háan Trump-turninn sinn undir starfsfólk sitt og hótel fyrir ferðamenn og diplómata,“ segir Anders Kelstrup í texta sínum.

„Gömlu styttunni af Hans Egede, dansk-norska prestinum sem kristnaði Grænland og gerði það að nýlendu Danmerkur á 18. öld, hefur verið skipt út fyrir meira viðeigandi „Frelsisstyttuna“ frá New York.

Frumbyggjarnir „Inúítarnir“, hafi verið fluttir á þægilegt verndarsvæði fyrir „innfædda Inúíta“, rétt eins og gert var við „frumbyggja Ameríku“, indíána í Bandaríkjunum. Hægur leikur væri að koma á fót svipuðu verndarsvæði fyrir þá tæplega sextíu þúsund inúíta sem búa á Grænlandi.

Í friðlandinu geta inúítar lifað þægilega á tekjum af ferðamönnum sem flykkjast til að upplifa einstaka og frumstæða menningu þeirra, heillandi klæðaburð, sérstakt tungumál og frumstæða lífshætti í snjóhúsum, íglúum, eða jarðhúsum með torfþökum.

Grænlendingar sem þjóna Trump hafa fengið fallegar rauðar MAGA-húfur, vopn í hendurnar og ókeypis Tesla-bíla. Þeir annast Inúíta á verndarsvæðinu.

Allt svæðið er mjög hervætt með skriðdrekum, eldflaugum, flugvélum og þyrlum. Þetta er til að verja Grænland og ómetanleg auðæfi landsins með sjaldgæfum málmum fyrir hátækniiðnaðinn til að verjast árásum frá Kína eða Rússlandi. Og til að koma í veg fyrir að við í Danmörku reynum að endurheimta Grænland,“ segir Anders Kelstrup um verk sitt.

Hér má sjá frétt Stöðvar 2 frá árinu 2019 þegar Trump byrjaði að ágirnast Grænland á fyrra kjörtímabili sínu: