„Þetta eru þýðingar­mestu skila­boð Davids Attenborough til þessa“

Myndin ber heitið Hafið, eða Ocean á frummálinu, og var heimsfrumsýnd í London fyrr í vikunni. Í kvöld fór svo fram sérstök frumsýning á vegum Náttúruverndarsamtaka Íslands, Landverndar, Icelandic Wildlife Fund, Hvalavina og NASF.

„Við vorum svo heppin að það tóku sig saman nokkur umhverfis- og dýraverndunarsamtök og óskuðu eftir því að fá að búa til svona hátíðarfrumsýningu hér á Íslandi. Þannig að leikstjórinn kemur ennþá í þreytukasti beint eftir frumsýninguna beint til okkar sem er mikill heiður,“ segir Katrín Oddsdóttir lögmaður en hún kom að uppsetningu sýningarinnar hérlendis.

„Við erum að hugsa það að Ísland sem eyja og mikil þjóð hafsins þarf að fara byrja þetta samtal almennilega um hvernig eiga að vernda hafið okkar. Það er það sem að David, sem er náttúrulega kóngurinn, segir sjálfur í myndinni að við verðum að vernda hafið. Það eru hans niðurstaða eftir öll þessi 99 ár á þessari jörð að rannsaka hana og hennar vistkerfi, að hafið sé það mikilvægasta. Það er boðskapurinn í myndinni.“

Toby Nowlan, leikstjóri kvikmyndarinnar, er staddur hérlendis og náði Tómas Arnar Þorláksson, fréttamaður Stöðvar 2 tali af honum.

„Þetta eru þýðingarmestu skilaboð David Attenborough til þessa. Þetta er mikilvægasta saga sem hann hefur nokkru sinni sagt. Það verður varla brýnna en þetta. Myndin var frumsýnd í þessari viku á 99 ára afmælinu hans. Þetta er kvikmyndaviðburður sem við vonumst sannarlega að marki tímamót, snúi við blaðinu og hjálpi til við að bjarga hafinu,“ sagði Nowlan.

Hann segir það lukku Íslendinga að vera umlukta hafi og vonar að myndin höfði til allra. Myndin sé persónulegasta verk Attenborough hingað til og að hann eigi mögulega enn eitthvað eftir, þrátt fyrir að vera orðinn 99 ára. Hann náði þeim merka áfanga 8. maí.

„Hann er ótrúlegur. Hann vinnur nánast á hverjum degi og varð 99 ára í þessari viku. Ef að við yrðum svona 99 ára að aldri yrðum við glöð. Einn daginn vorum við við tökur á ísköldum degi á suðurströnd Englands. Það var alskýjað og veðrið var leiðinlegt. Hitinn var eitt eða tvö stig í byrjun mars. Hann fór með upphafs- og lokaorð myndarinnar um hvernig hann hefur lifað í hundrað ár en gerir sér grein fyrir því að ekkert er mikilvægara en hafið.“

Vonast til að kvikmyndin hreyfi við fólki

Katrín ber vonir til þess að kvikmyndin muni vekja upp umræðu í samfélaginu um hafvernd þar sem Íslendingar séu þjóð hafsins.

„Það verða fulltrúar frá öllum flokkum hér í kvöld og mikið af fólki sem er í sjávarútveginum, fullt af fræðimönnum og alls konar stofnunum. Þannig að kannski nær þessi mynd að búa til eitthvert upphaf á þverfaglegu samtali þar sem allir sammælast um það að gera þetta saman því þetta er hagur okkar allra að vernda náttúruna og sérstaklega hafið,“ segir hún.

Ýmis málefni sem varða Íslendinga, líkt og togaraveiðar, eru tekin fyrir í kvikmyndinni. 

„Það er fullt af slíkum aðferðum sem við vonum að hefjist nú af fullum krafti og myndin verði einhvers konar byrjunarpunktur í því að fólk fari að tala saman af fullri alvöru og framkvæma þessa mikilvægu hluti sem við verðum að gera til að vernda hafið,“ segir Katrín.