Páskakveðjur stjórn­mála­flokka: Gervi­greind, páskaeggjaleit og Sig­mundur með kanínueyru

Gervigreindin er greinilega komin út um allt því hún hefur náð að smjúga inn í jafn sígilt fyrirbæri og páskakveðjur stjórnmálaflokka. Það er spurning hvernig túlka má þá þróun. Hér fyrir neðan má sjá sex ólíkar páskakveðjur.

Kristrún í páskaeggjaleit í morgun

Samfylkingin, stærsti flokkur landsins í þingmannafjölda talið, sendir enga formlega kveðju á síðum sínum en Kristrún Frostadóttir, forsætisráðherra og formaður flokksins, gerði það hins vegar í Facebook-færslu í morgun.

„Páskaeggjaleitin er hafin hér á heimilinu!“ skrifar Kristrún í færslunni og birtir mynd af múmínbolla með dorgandi múmínpabba, vísbendingum í leitinni og pappapáskaeggi.

„Frábært að fá smá tíma með fjölskyldu um páskana. Vona að þið hafið öll haft það gott yfir hátíðirnar. Ég sendi sérstaklega hlýja kveðju til þeirra sem standa vaktina og eru í vinnu rauðu dagana og til þeirra sem eiga um sárt að binda 🌹 Gleðilega páska kæru landsmenn 🐣😌“

Löng kveðja á páskadagskvöldi

Viðreisn birtir kveðju frá Þorgerði Katrínu Gunnarsdóttur, formanni flokksins og utanríkisráðherra, á Facebook upp úr ellefuleytinu í kvöld.

„Megum við öll, í anda páskahátíðarinna, leggja okkar af mörkum til að hlúa að friði, samkennd og mannréttindum - nær og fjær,“ segir Þorgerður í kveðju sinni sem er í lengri kantinum.

Þá minnist hún krossfestingar og upprisu Jesú Krists og segir hug sinn hjá þeim sem þjáist fyrir botni Miðjarðarhafs þar sem „almennir borgarar þurfa að horfast í augu við ólíðandi grimmd og óbærilegt óréttlæti, heil samfélög hafa verið jöfnuð við jörðu, neyðaraðstoð stöðvuð og hundruð þúsunda á vergangi.“

Um sé að ræða „gróf og augljós brot gegn alþjóðalögum“ og orðin „stríðsglæpir og þjóðernishreinsanir“ komi upp í hugann.

Hún hugsar einnig til Úkraínumanna sem hafi í þrjú ár þurft „að berjast fyrir tilverurétti sínum og frelsi í skugga miskunnarlausrar innrásar Rússa.“ Allar þessar hörmungar og stríðsglæpi fordæmi Íslendingar og þeir sitji heldur ekki „þegjandi og hljóðalaust“ þegar vegið er að réttindum kvenna, hinsegin og trans fólks og láti í sér heyra.

Páskaungar Flokks fólksins

Af ríkisstjórnarflokkunum þremur er Flokkur fólksins með allra skemmtilegustu og frumlegustu páskakveðjuna.

Á Facebook-síðu flokksins má sjá tíu myndir, sennilega smíðaðar af gervigreind, þar sem búið er að breyta tíu þingmönnum flokksins í litla teiknimyndarfígúrur ofan á súkkulaðieggjum.

„Gleðilega páska kæru vinir 🐣🐥“ segir við myndirnar.

Einfaldar en krúttlegar kveðjur frá Sjálfstæðismönnum

Hinn gamalgróni Sjálfstæðisflokkur lætur sér nægja að birta mynd á Facebook með ljósbláum bakgrunni, mislitum eggjum og blómum og kveðjunni: „Sjálfstæðisflokkurinn óskar landsmönnum öllum gleðilegra páska.“

Á vefsíðu sinni birtir flokkurinn mynd af þremur litlum páskaungum og skrifar við hana sambærilega kveðju: „Sjálfstæðisflokkurinn óskar landsmönnum öllum gleðilegrar páskahátíðar.“

Kanínu-Sigmundur og Miðflokksmenn senda kærar kveðjur

Miðflokksmenn senda einfalda en skemmtilega bleika kanínukveðju á Facebook.

Þar má sjá átta þingmanna þingflokk Miðflokksins á bleikum bakgrunni nema hvað formaðurinn, Sigmundur Davíð Gunnlaugsson, er með stór og myndarleg kanínueyru.

„Gleðilega páska! Kærar kveðjur frá þingflokki Miðflokksins,“ stendur við myndina.

Hugleiðing um Passíusálma og gervigreindarhetjur

Þingflokkur Framsóknar virðist eini þingflokkurinn sem ekki sendir formlega kveðju til flokksmanna eða landsmanna.

Hins vegar hefur borgarstjórnarflokkur Framsóknar í Reykjavík stokkið á „gervigreindartrendið“eins og þau orða það og látið gervigreind smíða mynd af fjórum borgarfulltrúum og fjórum varaborgarfulltrúum flokksins í formi einhvers konar leikfanga-ofurhetja í grænum dótapakka merktum Páskum.

Lilja Dögg Alfreðsdóttir, varaformaður Framsóknar, skrifar einnig hugvekju á vefsíðu flokksins um Passíusálma Hallgríms Péturssonar og páskahátíðina.

„Páska­hátíðin er kjör­inn tími fyr­ir sam­vist­ir við sína nán­ustu og njóta þess sem er í boði á vett­vangi hinna skap­andi greina. Vita­skuld er þetta einnig til­val­inn tími til að íhuga boðskap þess­ar­ar trú­ar­hátíðar. Pass­íusálm­ar Hall­gríms Pét­urs­son­ar eru órjúf­an­lega tengd­ir pásk­um og hafa fylgt ís­lensku þjóðinni um ald­ir,“ skrifar Lilja í hugvekju sinni.

Hún segir sálmana þá fegurstu sem ortir hafa verið og segist alltaf lesa þá í aðdraganda hátíðarinnar. Í sálmunum öðlist íslenskt mál „nýj­ar vídd­ir feg­urðar og næmni, sem skýr­ir djúp áhrif þeirra á þjóðarsál­ina.“

„Við erum rík sem þjóð að geta hallað okk­ur aft­ur um páska­hátíðina og notið þessa auðuga menn­ing­ar­arfs. Við erum líka afar lán­söm að búa í landi þar sem friður og frelsi eru ríkj­andi,“ skrifar hún.