Stórt skref en KSÍ í kapphlaupi við tímann

Valur Páll Eiríksson skrifar 19. apríl 2025 07:01

Þorvaldur Örlygsson fylgist vel með gangi mála á Laugardalsvelli og var viðstaddur þegar sáð var í vallarstæðið í vikunni. Vísir/Samsett

Margt hefur afrekast frá því að framkvæmdir hófust á Laugardalsvelli í október síðastliðnum. Stjórnendur hjá KSÍ eru nú í kapphlaupi við tímann að ná Laugardalsvelli leikfærum fyrir leik kvennalandsliðsins í júní.

Ísland mætir Frakklandi í síðasta leik liðsins í Þjóðadeild kvenna í fótbolta þann 3. júní næstkomandi. Stefnan er að sá leikur fari fram á Laugardalsvelli og vannst stór áfangi í þá átt er sáð var fyrir nýjum grasfleti í vikunni.

„Þetta er góður dagur í dag. Við erum að byrja að sá og erum mjög spennt að halda tímasetningunni. Fræin eru að komast niður og við setjum svo dúk yfir á morgun áður en við saumum í völlinn eftir einhverja tíu daga. Við erum enn þá á áætlun að stefna á að spila hérna í byrjun júní,“ segir Þorvaldur Örlygsson, formaður KSÍ, í samtali við íþróttadeild.

Fræin liggi því undir dúki, í blautum og upphituðum jarðvegi sem stendur. Eftir rúma viku verði farið í að sauma gervigras saman við náttúrulega grasið og eftir muni standa hybridvöllur - blanda af grasi og gervigrasi. Á næstu vikum verði svo þökulagt á svæðið í kring og gervigras lagt meðfram vellinum.

Gervigrasið sem fer meðfram vellinum nýtist sem upphitunarsvæði fyrir leikmenn. Það er endurnýtt gras sem rifið var af velli Gróttu á Seltjarnarnesi. Þannig verður losnað undan veseni og kostnaði við förgun þess.

Sáningarvél að verki. Gríðarmiklu magni þarf að sá í völl sem þennan og má sjá brotabrot fræpokanna neðst í mynd. Þetta er ekkert tún fyrir beitarland.Vísir/Stefán

Aðspurður hvernig sé að fylgjast með út um skrifstofugluggann segir hann mikla vinnu hafa unnist, þó enn sé dökkt yfir. Það sjái þó fyrir endann á svörtum Laugardalsvelli.

„Það er rólegri gangur að horfa á þetta. En hér er verið að vinna á fullu að hitalögnum, vökvunarkerfinu og öllu hér í kring. Það er enn dökkt hérna yfir en á næstu tveimur til þremur vikum, þegar fer að snyrtast í kring að sjá árangur verksins.“

Velkomin í nútímann

Líkt og Þorvaldur nefnir getur útlitið blekkt. Þrátt fyrir að Laugardalsvöllur líti enn heldur dapurlega út þá er búið að grafa yfir mesta þá vinnu sem hefur átt sér stað síðan í október.

Sex gríðarstórir vatnstankar eru til staðar við völlinn. Vatn úr þeim fer í vökvunarkerfi sem er innbyggt í völlinn. Menn geta því vökvað eins og þá listir og jafnvel ef þrýstingsvandræði gera vart við sig.Vísir/Stefán

Vökvunarkerfi er undir vellinum, líkt og þekkist á stærstu leikvöngum heims. Sé vandamál með þrýsting hefur verið komið upp vatnsstöð með fjölda gríðarstórra vatnstanka við enda vallarins.

Þá er einnig framúrskarandi hitakerfi til staðar sem fylgir gríðarmikill tæknibúnaður. Vallarstarfsmenn eigi því að geta haldið grasinu við með því að stýra hita í jarðvegi, þó kuldinn sé töluverður á yfirborðinu. Landslið Íslands eigi því loks að geta spilað fótboltaleiki að vetri til.

Heilt herbergi með allskyns tæknibúnaði og köplum, auk vatnsleiðsla, þarf undir hitakerfi vallarins. Kerfið gerir það að verkum að gras getur vaxið og viðhaldið sér þrátt fyrir kalda vetur.Vísir/Stefán

„Við vonumst eftir birtu og góðu veðri en gerum okkur grein fyrir því að það komi smá kuldavindar. En við setjum góðan hita undir og keyrum þetta upp,“

Ertu bjartsýnn fyrir því að við sjáum leik Íslands og Frakklands á Laugardalsvelli í sumar?

„Já ég er bjartsýnn. Við byrjuðum 14. október að stinga upp hérna og nú er 16. apríl. Við höldum áfram að keyra þetta áfram. Við erum bjartsýn á að við spilum hérna 3. júní. Ég vona það svo sannarlega,“ segir Þorvaldur.

Fréttina má sjá í spilaranum að ofan.

Laugardalsvöllur Nýr þjóðarleikvangur KSÍ Landslið karla í fótbolta Landslið kvenna í fótbolta Fótbolti