Spyrja sig hvort Freyr geti heillað eins og Slot í Liver­pool

Freyr fær það verk­efni að feta í fót­spor Eirik Horn­elands sem reyndist afar vinsæll í starfi hjá Brann og skilaði góðum árangri sem varð meðal annars til þess að liðið endaði í 2.sæti norsku úr­vals­deildarinnar á síðasta tíma­bili.

Það er mat sér­fræðinga TV 2 að þrátt fyrir að Brann hafi ekki spilað einn einasta keppnis­leik undir stjórn Freys þá hafi hann náð að heilla bæði leik­menn og stuðnings­menn liðsins með góðum úr­slitum á undir­búningstíma­bilinu sem og fram­komu sinni.

„Nú bíðum við eftir að sjá hvernig honum tekst til þegar að al­varan tekur við,“ segir í um­fjöllun TV 2 um Brann sem miðillinn spáir 4.sæti á komandi tíma­bili í norsku úr­vals­deildinni.

Brann hefur ekki tapað leik undir stjórn Freysa á undir­búningstíma­bilinu en sér­fræðingar TV 2 velta því fyrir sér hvort þar ráði síðustu leifar Horn­eland í starfi eða hvort þar sé um áhrif Freys að gæta.

Hjá Brann setja menn markið hátt og á að berjast við topp deildarinnar auk þess sem félagið á góðan mögu­leika á að komast í riðla­keppni í Evrópu.

„Takist þeim það hins vegar teljum við að það muni koma niður á gengi liðsins heima fyrir í haust á tíma­punkti þar sem Brann hefur gengið vel á undan­förnum árum þegar að liðið hefur ekki verið í Evrópu.“

Freyr hefur fengið inn þrjá nýja leik­menn í yngri kantinum, einn þeirra er Eggert Aron Guð­munds­son sem kemur frá Elfs­borg og á móti hafa þrír leik­menn um og yfir 30 ára aldur horfið á braut.

„Það segir okkur að Brann er að hugsa um upp­byggingu en ef við eigum að leggja kalt mat á þetta þá er þeim ekki al­vara í því að reyna sækja gullið. Bilið milli þeirra og Bodø/Glimt er of mikið, við teljum bilið vera meira en á síðasta tíma­bili.“

Forráða­menn Brann geti sætt sig við Evrópuævintýri og sæti á meðal efstu fjögurra liða norsku úr­vals­deildarinnar að tíma­bilinu loknu. Það er mat TV 2 að þátt­taka í Evrópu­keppni fái for­gang.

Stóra spurningar­merkið við gengi Brann á tíma­bilinu snúi að Frey.

„Getur hann, líkt og Arne Slot hjá Liver­pool, fyllt upp í fót­spor for­vera síns eða verður hann hinn næsti Rikard Nor­ling sem segir réttu hlutina en nær ekki að skila inn úr­slitum?