Ekki við stjórn Sameykis að sakast og fátt annað í stöðunni

Hún segir þó að fátt annað hafi verið í stöðunni fyrir stjórn félagsins. Ekki sé nein önnur leið til að losna við formann sem ríkir ósætti um.

Stjórn Sameykis stéttarfélags í almannaþjónustu gerði á síðasta ári starfslokasamning við þáverandi formann stéttarfélagsins en kostnaður vegna samningsins nemur rúmlega 70 milljónum króna. Þórarinn Eyfjörð verður því á launum hjá stéttarfélaginu í um tvö og hálft ár en starfslokasamningur var gerður við hann rúmum sex mánuðum eftir endurkjör í embætti formanns. Hann vék úr embætti eftir ásakanir um að hafa gengið of hart fram gagnvart starfsfólki Sameykis.

Fordæmalaus greiðsla

Sameyki er aðildarfélag BSRB en Sonja Ýr Þorbergsdóttir, formaður BSRB, segist ekki þekkja fordæmi um jafn langa greiðslu til starfsloka. Hún ítrekar að Sameyki sé sjálfstætt stéttarfélag og málið sé alfarið á þeirra borði. Leiðtogar stéttarfélaga eru kjörnir en ekki ráðnir sem geti skapað sérkennilega stöðu við samningaborðið.

„Það þýðir það að sá sem er kjörinn og ætti að hætta fyrr áður en kjörtímabili líkur. Hann þarf að taka þá ákvörðun sjálfur. Af því leiðir auðvitað að það er öðruvísi samningsstaða. Þannig viðkomandi getur þá auðvitað horft til þess hvað þurfi raunverulega til svo hann fari frá störfum.“

Óeðlilegt að félagsfólk borgi brúsann

Oft séu ekki reglur til staðar hjá félögum um hvaða kjör eigi að gilda þegar að viðkomandi segir af störfum áður en kjörtímabili líkur. Erfitt sé að fyrirbyggja að fráfarandi leiðtogar notfæri sér samningsstöðuna. Óeðlilegt sé að félagsfólk borgi brúsann.

„Það er auðvitað ekkert eðlilegt við það, þó að þetta séu mjög einstakar aðstæður að einhver sé á launum í tæplega þrjú ár sem hefur verið að gegna þessu hlutverk að vinna í þágu launafólks. Sérstaklega ef við tökum úr okkar hópi, þetta er ekki mjög há laun hjá okkar félagsfólki.“

Engir aðrir valkostir í stöðunni

Hún segir að Þórarinn og aðrir sem komist í álíka stöðu að taka við peningum félagsmanna án þess að starfa í þeirra þágu þurfi að gera það upp við eigin samvisku hvort þeir þiggi umrædd laun. Ekki sé við stjórn Sameykis að sakast enda fátt annað í stöðunni ef losna á við formann sem ríkir ósætti um.

„Ef við horfum á þetta út frá bæjardyrum stjórnar eða þeirra sem ákveða það hvort það sé komið að leiðarlokum að þá eru valkostirnir raunverulega engir aðrir en þessir.“

Kári Sigurðsson, núverandi formaður Sameykis, gaf ekki kost á viðtali að svo stöddu en hann mun ræða málið með félagsmönnum sínum á aðalfundi Sameykis í dag.