Óseldir flug­eldar geymdir í vel vöktuðu húsi

Á síðasta ári voru flutt inn til landsins ríflega 630 tonn af flugeldum. Stóran hluta af þeim flutti Slysavarnafélagið Landsbjörg inn. Aðeins er leyfilegt að selja og skjóta upp flugeldum nokkra daga á ári og því þarf að geyma það sem ekki selst á öruggum stað.

Landsbjörg geymir flugeldana sem ekki seldust um áramótin í sérstöku húsi á höfuðborgarsvæðinu. Staðsetningu þess má ekki gefa upp en mikið eftirlit er í kringum það. Sérstakt leyfi þarf til að koma nálægt því og inn í það.

„Þetta hús er sérhannað til þess að geyma flugelda. Hér er hita- og rakastýring. Við vöktum það tuttugu og fjóra sjö. Hér er aðgengi mjög skert og fáir vita af tilvist þessa húss. Við viljum geyma þetta við bestu mögulegar aðstæður því þetta er viðkvæm vara þannig sé og hún þolir ekki að vera hvar sem er,“ segir Jón Þór Víglundsson talsmaður Landsbjargar.

Í húsinu eru núna hátt í þrjú hundruð bretti af flugeldum.

„Flugeldasalan er okkar stærsta fjáröflun og við viljum ekki vera uppiskroppa með vöru þessa örfáu daga sem við seljum á ári. Þannig það gefur augaleið að við viljum eiga borð fyrir báru og smá lager og þá þurfum við að geyma hann einhvers staðar.

Jón Þór segir allt kapp lagt á að tryggja öryggi á svæðinu.

„Við notum hér lyftara sem er sérhannaður til að gefa ekki frá sér neista. Þarna inn á ekkert að fara sem gæti hugsanlega valdið eldsvoða.“