Reykja­vík muni mögu­lega gera sér­samninga við kennara

Dóra Björt Guðjónsdóttir oddviti Pírata í Reykjavík og Sanna Magdalena Mörtudóttir oddviti Sósíalistaflokksins voru til viðtals í Sprengisandi á Bylgjunni í morgun að ræða nýjan borgarstjórnarmeirihluta, sem þær vilja reyndar frekar kalla samstarf en meirihluta.

Talið barst að leikskólavanda Reykjavíkur og út frá því var vikið að stöðunni í kjaradeilu kennara.

„Við vitum hvernig staðan er í samfélaginu, og mér finnst alveg eðlilegt að Reykjavíkurborg myndi skoða að það yrði rætt hvort að borgin geti jafnvel skoðað það að semja sjálf við kennara, mér fyndist það alveg eðlilegt,“ sagði Sanna Magdalena.

Viðtalið er hér í fullri lengd en umræður um kjaramálin hófust í kringum mínútu fimmtán.

Ertu þá þeirrar skoðunar að Reykjavíkurborg eigi að kljúfa sig úr Sambandi íslenskra sveitarfélaga og semja beint við kennara?

„Mér finnst alveg í ljósi þess sem að kom fram á borgarstjórnarfundinum á föstudaginn, þar sem að Heiða Björg Hilmisdóttir borgarstjóri, hún lýsir því í rauninni hvað hafi átt sér stað. Þá finnst mér alveg eðlilegt næsta skref að ræða það hvort þetta sé skynsamlegt,“ svaraði Sanna.

Fram hefur komið að Heiða Björg Hilmisdóttir, nýr borgarstjóri, hafi stutt innanhústillöguna sem stjórn SÍF hafnaði í vikunni.

Samfélagið komið með nóg af deilunni

Dóra Björt segir að samfélagið sé komið með nóg af þessari kjaradeilu.

„Við þurfum bara að leysa þetta,“ segir hún.

„Mér finnst bara eðlilegt að allt sé skoðað í ljósi aðstæðna vegna þess að þessi tillaga var ekki samþykkt, það logar allt í samfélaginu, kennarar eru að upplifa og eru að fara fram á réttmæta leiðréttingu í ljósi þess sem þeim hefur verið lofað, þannig það þarf bara að stíga djörf skref í þessu.“

Hún vonist þó til þess að SÍF muni leysa þetta mál eins og þeim hafi verið falið.

Forgangsmál að vera með öll sveitarfélögin með

Magnús Þór Jónsson, formaður Kennarasambandsins, var einnig til viðtals á Sprengisandi í dag en hann segir að staðan sé þannig að allt hreyfist mjög hratt og getið tekið alls konar beygjur.

Hann segir að það sé skýrt forgangsmál að vera með öll sveitarfélögin með í samningaviðræðunum. Hann myndi vilja setjast niður með launadeild SÍF og „bara klárað samninginn fyrir alla kennara á landinu.“

„Hins vegar er það bara þannig, og við höfum alveg bent á það, þá hefur ábyrgð hvers sveitarfélags fyrir sig aldrei verið á þeim stað, að menn geti bara bent á einhvern ákveðinn hóp og það sé alltaf lægsti samnefnari hvers og eins sem býr til samninginn.“

Vilji Reykjavík gera líta á Kennarasambandið eins og BSRB, BHM, og önnur stéttarfélög sem hún semji sér við, sé það skylda hvers stéttarfélags að setjast niður og fara yfir málið.

„Þetta snýst um það að við viljum ná samningum við okkar fólk, sem að gerir kennarastarfið samkeppnishæft í launum og vinnuaðstöðu við sambærileg störf á almennum markaði, og þar liggur grunntónninn.“

Viðtalið við Magnús er hér í fullri lengd en umræðan um sérsamninginn hefst á mínútu sextán.