Bæði Sverrir Ingi og Hjörtur voru í hjarta varnarinnar hjá sínum liðum í dag. Sá fyrrnefndi kom Panathinaikos yfir á 20. mínútu eftir undirbúning Karol Swiderski. Staðan var 1-0 í hálfleik og var orðin 2-0 þegar gestirnir í Volos minnkuðu muninn.
Víkingar eru mættir til Grikklands þar sem þeir undirbúa sig fyrir síðari leik sinn gegn Sverri Inga og félögum í umspili um sæti í 16-liða úrslitum Sambandsdeildar Evrópu. Víkingar unnu frækinn 2-1 sigur á „heimavelli“ í Finnlandi á dögunum og því mikil spenna fyrir leiknum sem fram fer á fimmtudaginn kemur.
Sverrir Ingi var að koma Panathinaikos yfir gegn Hirti Hermanns og félögum í NFC Volos pic.twitter.com/jC7bCIO0f7
— Hörður (@horduragustsson) February 16, 2025
Eftir sigur dagsins er Panathinaikos í 3. sæti með 46 stig, fimm stigum á eftir toppliði Olympiacos. Volos er í 12. sæti af 14 liðum með 21 stig.
Í Danmörku var Mikael Andersson á skotskónum þegar AGF vann gríðarlega sannfærandi 4-1 útisigur á Sönderjyske. Mikael skoraði annað mark gestanna en gamla brýnið Patrick Mortensen skoraði þrennu fyrir AGF.
Kristall Máni Ingason var í byrjunarliði Sönderjyske en var tekinn af velli á 82. mínútu á meðan Mikael spilaði allan leikinn.
AGF er í 3. sæti með 31 stig, tveimur minna en topplið FC Kaupmannahöfn og Midtjylland sem eiga bæði leik til góða. Sönderjyske er í 10. sæti með 16 stig.
