Trump ó­sáttur við bón biskups um miskunn

Trump var settur inn sem forseti við hátíðlega athöfn á mánudag. Síðan þá hefur hann verið iðinn við kolann og undirritað fjöldan allan af forsetatilskipunum. 

Ljóst er að forsetatilskipanirnar sem Trump undirritaði og þær aðgerðir sem hann hefur boðað til munu skapa óvissu og jafnvel ótta hjá stórum hópum fólks en hann lýsti meðal annars yfir neyðarástandi við landamærin að Mexíkó.

Yfirlýst neyðarástand og aðrar tilskipanir er varða málefni hælisleitenda og innflytjenda munu líklega gera það að verkum að óvissuástand skapast við landamærin, þar sem Bandaríkin munu tímabundið hætta að vinna úr málum umsækjenda.

Staða trans fólks er einnig mjög óviss eftir gærdaginn en Trump undirritaði tilskipun þar sem kveðið er á um að alríkið viðurkenni aðeins tvö kyn, karlkyn og kvenkyn, sem séu ákvörðuð við fæðingu.

Hinsegin fólk í báðum flokkum

Mari­ann Ed­g­ar Budde, biskup í Washington DC, gerði aðgerðir Trumps að viðfangsefni sínu í messu í gær. 

„Leyfðu mér að leggja fram eina síðustu bón, herra forseti. Milljónir hafa lagt traust sitt á þig og, eins og þú sagðir þjóðinni í gær, hefur þú fundið fyrir krafti guðs sem hefur verið okkur náðugur. Í nafni Guðs okkar bið ég þig að sýna landsmönnum okkar sem eru hræddir miskunn,“ sagði biskupinn, að forsetanum viðstöddum.

Það væru samkynhneigðir, lesbíur og trans fólk í fjölskyldum sem tilheyra bæði Demókrötum, Repúblikanum og utan flokka, sumir þeirra óttuðust nú um líf sitt.

Innflytjendur greiði skatta og séu góðir nágrannar

Þá vék biskupinn máli sínu að innflytjendum, fólkinu sem vinni við að plægja akra Bandaríkjamann, þrífa skrifstofur þeirra, starfi á alifuglabúum, og sláturhúsum; fólkinu sem vaski upp eftir Bandaríkjamenn á veitingahúsum og vinnur vaktir á sjúkrahúsum.

„Þau eru kannski ekki ríkisborgarar eða hafa nauðsynleg réttindi. En mikill meirihluti innflytjenda eru ekki glæpamenn. Þeir greiða skatta og eru góðir nágrannar. Þeir eru trúfastir meðlimir kirkna okkar, moska, samkunduhúsa og mustera. Ég bið þig að sýna miskunn, herra forseti, þeim samfélögum okkar þar sem börn óttast að foreldrar þeirra verði teknir frá þeim. Ég bið einnig að þú hjálpir þeim sem flýja stríðsástand og ofsóknir í sínum eigin löndum, að þau finni samúð og að þau séu velkomin hér.“

Guð kenni okkur að við eigum að vera miskunnsöm við ókunnuga, því allir Bandaríkjamenn hafi einu sinni verið ókunnugir þar í landi.

„Megi Guð veita okkur styrk og hugrekki til að heiðra reisn allra manna, að segja sannleikann hvert við annað í kærleika og ganga saman með guði vorum af auðmýkt með velferð alls fólks að leiðarljósi. Velferð allra íbúa í Bandaríkjunum og heiminum öllum. Amen.“

Forsetinn ekki sáttur með að vera beðinn um miskunn

Svo virðist sem Trump hafi ekki verið ánægður með boðskap biskupsins, það sást bersýnilega á svipbrigðum forsetans á meðan hann hlýddi á messuna og ekki síður á færslu hans á samfélagsmiðlinum Truth social. Trump er eigandi Truth social.

„Hinn svokallaði biskup sem ávarpaði guðsþjónustuna í gær var róttækur vinstrisinnaður Trump-hatari. Hún dró kirkju sína inn í heim stjórnmálanna á verulega ókurteisislegan hátt. Hún var andstyggileg í tón og hvorki sannfærandi né gáfuleg.“

Hún hafi gleymt að minnast á mikinn fjölda ólöglegra innflytjenda sem hefði komið til Bandaríkjanna og myrt fólk. Margir þeirra hafi komið úr fangelsum og geðsjúkrahúsum. Það væri risastór glæpaalda að ganga yfir Bandaríkin.

„Burtséð frá óviðeigandi staðhæfingum hennar, þá var messan mjög leiðinleg og ekki hvetjandi. Hún er ekki starfi sínu vaxin! Hún og kirkja hennar skulda almenningi afsökunarbeiðni! t [svo]“