„Hef ein­stak­lega gaman af þessari stans­lausu niður­lægingu“

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fólk fer að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

„Ég vakna klukkan sjö nema þegar ég mæti í ræktina, þá er það hálf sjö, er að vinna með að mæta þangað þrisvar í viku. 

Er með súper góða gulrót því þar hitti ég vinkonu mína sem er algjör snillingur kynntist henni þegar ég var fimm ára svo það eru komin 50 ár af einstökum vinskap. 

Viðurkenni að ef hún mætir ekki þá á ég til að skrópa svo lítill er sjálfsaginn. 

Ég hef sagt henni að segja mér alls ekki ef hún kemst ekki, en hún er svo samviskusöm þannig að í þessi örfáu skipti sem hún klikkar þá veit ég allt af því.“

Hvað er það fyrsta sem þú gerir á morgnana?

„Gott kaffi sem ég eða maðurinn minn hellum upp á, fer eftir því hver vaknar fyrst, er það allra fyrsta sem gerist á morgnana. Það sem okkur finnst súper gott kaffi er Merilld þetta klassíska og uppáhellt. 

Næsta sem gerist er að ég tek fréttamiðlana enda forvitin með eindæmum og síðan er bónus að hitta á unga fólkið sem ég bý með, sem eru öll á fullu og alltaf eitthvað nýtt að frétta af. Síðan er það bara að drífa sig í skemmtilegu vinnuna mína. Þar bíður mín líka gott kaffi svo bolli númer tvö er tekinn þar.“

Nefndu vonlausasta áramótaheit sem þú hefur ákveðið?

„Verða sjúklega góð í golfi. Byrjaði fyrir sirka fjórum árum og ætlaði að sigra þessa íþrótt á einu ári og með frekar lítinn tíma en markmið fyrsta árs var að fara niður fyrir 30 í forgjöf. Ég er sem sagt fjórum árum seinna enn að vinna að því markmiði.

Líklega það erfiðasta sem ég hef tekist á við og algjör þráhyggja. Ég losna ekkert við þessa þráhyggju og er alltaf jafn ósátt við hversu léleg ég er.  Hef heyrt að það sé mikilvægt að æfa sig og fara í kennslu en því nenni ég alls ekki finnst svo gaman að spila. 

Það merkilega er samt að ég hef einstaklega gaman af þessari stanslausu niðurlægingu og er með nýtt markmið: Að hafa bara gaman af þessu.“

Í hvaða verkefni ertu að vinna helst í þessa dagana?

,,Við hjá Creditinfo erum með mjög metnaðarfulla áætlun fyrir árið sem einkennist af nýjungum og bættri þjónustu við okkar viðskiptavini. Síðasta ár var einstaklega skemmtilegt og gefandi með mikið af nýjum vörum og þjónustu og við viljum vera stöðugt á tánum og lesa vel í þarfir viðskiptavina okkar. Forgangsröðunin skiptir öllu og ég legg mikið upp úr að styðja vel við verkefni sem eru í fókus og sjá til þess að við höldum forgangsröðuninni að mestu auðvitað samt með ákveðnum sveigjanleika.“

Hvernig skipuleggur þú þig í vinnu?

„Ég skipulegg mig með hópnum mínum; stóra myndin er ákveðin á haustin og síðan er keyrt af stað á nýju ári. 

Við erum með skýr markmið sem við fylgjumst náið með og eins road map sem farið er yfir tvisvar í mánuði.

Dags daglega er það meira vika fyrir viku en ég skipulegg vikuna í lok viku, það er legg niður hvernig næsta vika á að líta út og síðan er ég með dagslista sem stýrir deginum. 

Skipulagið eins og ég legg það upp breytist þó oft og er það yfirleitt af hinu góða, það er vegna viðskiptavina eða starfsmanna en vinnan mín er einstaklega lifandi og skemmtileg.“

Hvenær ferðu að sofa á kvöldin?

,,Markmiðið er að vera sofnuð um ellefu á kvöldin en það næst ekkert alltaf en fyrir miðnætti er hörð lína. Ég finn mjög fyrir of litlum svefni og er víst með svefn á heilanum; það segja börnin mín því fyrsta spurningin mín alla morgna er víst hvernig svafstu. Ég veit hvað svefn skiptir rosalega miklu máli og er sjálf nokkuð viðkvæm. Til að mynda drekk ég ekki kaffi eftir hádegi á daginn og reyni síðan líka að loka tölvunni ekkert alltof seint á kvöldin.“