Skelltu Chelsea í þriðja sigri sínum á leiktíðinni

Ipswich er reyndar enn í fallsæti en fagnaði afar góðum 2-0 sigri gegn Chelsea í kvöld, í ensku úrvalsdeildinni í fótbolta. Þetta var annað tap Chelsea í röð og liðið missti af tækifæri til að fara aftur upp í 2. sæti.

Ipswich komst yfir eftir tíu mínútna leik þegar Filip Jörgensen, sem fékk tækifæri í marki Chelsea, braut á Liam Delap innan teigs. Delap tók spyrnuna sjálfur og skoraði þó að Jörgensen færi í rétt horn.

Joao Felix virtist hafa jafnað metin fyrir Chelsea á 25. mínútu, eftir frábæra sendingu Cole Palmer, en eftir dágóða stund var markið dæmt af vegna rangstöðu.

Staðan var því 1-0 í hálfleik og snemma í seinni hálfleik jók Omari Hutchinson svo muninn með marki eftir snarpa skyndisókn, eftir að Axel Disasi gaf boltann klaufalega frá sér á miðjunni. Hutchinson fagnaði markinu með miklum tilþrifum, gegn félaginu sem hann hóf feril sinn með.

Chelsea tókst aldrei að minnka muninn og er nú áfram með 35 stig í 4. sæti deildarinnar, tíu stigum á eftir toppliði Liverpool sem á leik til góða.

Ipswich komst með þessum þriðja sigri sínum í vetur upp fyrir Leicester og er í 18. sæti með 15 stig, einu stigi frá Wolves sem situr fyrir ofan fallsætin.