Bestu augna­blikin úr Kryddsíldinni

Umsjónarmenn þáttarins eru ritstjóri og fréttastjóri fréttastofu Stöðvar 2, Vísis og Bylgjunnar, þau Erla Björg Gunnarsdóttir og Kolbeinn Tumi Daðason. Telma Tómasson er gestgjafi þáttarins.

„Við erum mjög spennt fyrir Kryddsíldinni í ár. Hún kemur á skemmtilegum tíma þar sem splunkuný ríkisstjórn er rétt að koma sér fyrir og formenn í stjórnarandstöðu eru að sleikja sárin, nema kannski Sigmundur Davíð sem verður pottþétt í miklu stuði,“ segir Kolbeinn Tumi.

„Það hefur fækkað um tvo flokka á þingi svo þetta verður líkara Kryddsíldinni af gamla skólanum, sex formenn en ekki átta. Ég hugsa að það skapi skemmtilega dýnamík og enn þéttari þátt.“

Hann bætir við að áhorfendur hafi verið duglegir við að senda ábendingar á netfang fréttastofunnar ritstjorn(hja)visir.is um hvað nauðsynlegt sé að ræða. Þar sé af nægu að taka eftir viðburðaríkt ár. Þá ríki alltaf mikil eftirvænting eftir vali fréttastofu á manni ársins.

Vísir tók saman nokkur eftirminnileg augnablik úr Kryddsíldum síðustu þriggja áratuga.

„Fólki finnst hún hafa verið nákomin mér“

Í síðustu Kryddsíld ræddi Bjarni Benediktsson skipun Svanhildar Hólm Valsdóttur sem sendiherra í Bandaríkjunum.

„Þú ert búin að vera svo orðljót Inga“

Sigurður Ingi Jóhannsson og Inga Sæland tókust á í Kryddsíldinni í fyrra. Inga sagði að ríkisstjórnin væri handónýt og Sigurður Ingi var ekki sáttur með frammíköll Ingu.

„Össur, þú ert bara dóni. Þú ert sjálfur dóni, Davíð“

Árið 2002 sauð upp úr á milli Össurar Skarphéðinssonar, sem þá var formaður Samfylkingarinnar, og Davíðs Oddssonar, þáverandi forsætisráðherra. „Þú ert bara dóni,“ eru eflaust ein þekktustu ummælin sem fallið hafa í Kryddsíldinni.

Í klippunni hér að neðan má sjá brot af því besta þegar Kryddsíldin hélt upp á 25 ára afmæli árið 2015. Mörg ansi skemmtileg augnablik. Þar á meðal orðaskak Davíðs og Össurar og einnig augnablikið þegar útsendingu var hætt á þættinum vegna mótmæla árið 2008.

Inga Sæland treysti sér ekki

Inga Sæland, formaður Flokks fólksins, tilkynnti á gamlársdag árið 2021 að hún yrði ekki með í Kryddsíldinni í ljósi mikillar útbreiðslu Covid-19 í samfélaginu. Þórdís Kolbrún Reykfjörð Gylfadóttir, varaformaður Sjálfstæðisflokksins, hafði þá nýlokið við einangrun vegna smits.

„Það getur hver sem er keypt banka“

Árið 2009 var eflaust eitt það eftirminnilegasta á þessari öld. Árið byrjaði með mótmælum á Austurvelli og ráðamenn þjóðarinnar voru áberandi í umræðunni. Hér má sjá Gullkorn ársins 2009 sem voru sýnd í Kryddsíldinni það árið.

„Ég hef aldrei talað við Bjarna, ég þekki hann ekki neitt“

Í Kryddsíldinni fyrir tveimur árum voru leiðtogarnir fengnir til að hrósa hver öðrum. Björn Leví Gunnarsson hjá Pírötum sagðist aldrei hafa talað við Bjarna Benediktsson formann Sjálfstæðisflokksins. Sigmundur Davíð Gunnlaugsson, formaður Miðflokksins, hrósaði Birni Leví fyrir að þora að vera á sokkunum á Alþingi.

Bergur Ebbi gerði upp árið 2014

Grínistinn Bergur Ebbi Benediktsson gerði upp árið 2014. Sýn hans á pólitíkina var ansi kómísk. Sjón er sögu ríkari.

„Elín Hirst prumpaði einu sinni í lyftu og kenndi litlu barni um það“

Uppistandararnir Dóri DNA og Saga Garðarsdóttir héldu uppistand í Kryddsíldinni 2015 fyrir framan ráðamenn þjóðarinnar. Þar ræddu þau meðal annars um það hver væri fyndasti þingmaðurinn.

Sigmundur Davíð og Katrín hlógu á meðan Inga Sæland hélt eldræðu

Augnablikið þar sem Katrín Jakobsdóttir forsætisráðherra og Sigmundur Davíð Gunnlaugsson formaður Miðflokksins pískra sín á milli á meðan Inga Sæland fór mikinn um útlendingamál vöktu mikla athygli í Kryddsíldinni fyrir tveimur árum.

Gerði upp árið 2013 með lagi

Saga Garðarsdóttir grínisti gerði upp árið 2013 með áhugaverðu lagi. Þar söng hún meðal annars um PISA-könnunina, að danska skyldi verða valfrjáls og biðlaði til ráðamanna um að verða betra fólk.

Logi fékk staupið hennar Ingu Sæland

Í miðjum umræðum árið 2018 gaf Inga Sæland, formaður Fólks fólksins, Loga Einarssyni, formanni Samfylkingarinnar, staupið sitt. „Þetta var í sjónvarpinu,“ hvíslaði Logi að Ingu.

Þingmenn tóku „hú-ið“

Það þarf ekki að segja neitt um þessa klippu frá árinu 2016.

Algengt að persónuupplýsingar leki úr ráðuneytum

Sigmundur Davíð Gunnlaugsson, þáverandi formaður Framsóknarflokksins, fór yfir Lekamálið árið 2014. Þar sagði hann að það væri mjög algengt að persónuupplýsingar um einstaklinga leki út úr ráðuneytum.

Bakvið tjöldin í Kryddsíld

Og svona fer þetta allt saman fram. Skemmtilegt myndband sem sýnir vinnuna á bakvið tjöldin. Þetta skemmtilega myndband er frá undirbúningi Kryddsíldarinnar frá því fyrir tveimur árum.

Enn fleiri klippur má sjá á sjónvarpssíðu Kryddsíldarinnar hér á Vísi.