Um helmingur far­þega komst lífs af

Greint var frá flugslysinu í morgun eftir að farþegaflugvél hafði hrapað skammt frá borginni Aktau í Kasakstan. Flugvélin var á vegum Azerbaijan Airlines og á leið frá höfuðborginni Baku til rússnesku borgarinnar Grozny. 

Í frétt BBC er haft eftir flugfélaginu að flugvélinni hafi verið beint af leið vegna þoku. Myndefni sýnir vélina nálgast jörðina á ógnarhraða með virkan lendingarbúnað áður en mikill blossi kviknar við brotlendingu. Myndbönd í dreifingu sýna að auki farþega forða sér úr vélinni, marga með sýnilega áverka. 

Í tilkynningu flugfélagsins segir að tilraun hafi verið gerð til nauðlendingar um þremur kílómetrum frá borginni Aktau í Kasakstan. Rússneskir miðlar greina frá því að vélin gæti hafa rekist á hóp fugla áður en hún hrapaði. 

Flug milli Baku og Grozny liggja nú niðri á meðan slysið er rannsakað. Flestir um borð voru frá Aserbaídsjan, en sömuleiðis voru farþegar frá Rússlandi, Kasakstan og Kirgistan.