Óvissustig á Hellis­heiði, í Þrengslum og á Mosfellsheiði

Gular viðvaranir hafa þegar tekið gildi á vestanverðu landinu, þar með talið á höfuðborgarsvæðinu, en veðrið færist svo yfir landið þegar líður á daginn og í kvöld eru appelsínugular viðvaranir í gildi á norðurhelmingi landsins og á suðausturlandi. 

Þar er spáð stórhríð með vindhraða upp á allt að 28 metra á sekúndu og snjókomu og lélegu skyggni og því taldar miklar líkur á samgöngutruflunum. Ekkert ferðaveður, að sögn Veðurstofunnar. 

Vegagerðin vekur athygli á því að á Mosfellsheiði, í Þrengslum og á Hellisheiði er óvissustig í gildi frá klukkan sjö og fram til klukkan ellefu. Þar getur því komið til lokana með stuttum fyrirvara. 

Flestum komum og brottförum til og frá Keflavíkurflugvelli hefur verið aflýst eða frestað fram yfir hádegið. Nánari upplýsingar er að finna á vef flugvallarins. Sömu sögu er að segja af innanlandsfluginu.