Ís­lensk verð­trygging á manna­máli!

Það er alkunna hér að ungu fólki er refsað grimmilega af bankastofnunum, taki það ákvörðun að mennta sig á háskólastigi. Hérlendis er því reyndar haldið fram af mörgum að öll verðtrygging sé af hinu góða og kannski einnig bráðnauðsynleg. Samfélagið gengi ekki upp annars, það sé verðtryggingin sem tryggir öryggi þitt sjáðu til. Þvílíkt bull!

Tökum dæmi um hjúkrunarfræðinema sem tók í góðri trú verðtryggt námslán árið 2007. Lánsupphæð var í upphafi tvær milljónir. Konan er ung og bjartsýn á lífið og tilveruna, enda verður nú lítið mál að borga inn á og klára þetta sem fyrst. En raunin verður önnur, við bætist verðtryggt húsnæðislán og neytendalán sem hvort tveggja auka greiðslubyrði viðkomandi margfalt. Í dag borgar þessi hjúkrunarfræðingur ennþá af þessu verðtryggða námsláni og þegar lánstímabili lýkur mun hún hafa borgað um það bil tífalda upprunalega upphæð til bankans, eða í kringum tuttugu milljónir!

Tvær milljónir verða sem sagt að tuttugu milljónum áður en yfir lýkur!

Þannig virka öll verðtryggð lán á Íslandi, öfugt við nágrannalönd okkar þar sem verðtryggð lán til neytenda eru ekki til. Í Danmörku tekur þú óverðtryggt lán á hagkvæmum lánskjörum, byrjar að borga af því og sérð fljótlega að höfuðstóllinn lækkar. Þú sérð árangur og þér líður vel. Það er m.a. ein af ástæðum þess að ungt fólk flýr í umvörpum þangað.

Verðtrygging lána til neytenda hérlendis snýst ekki um að standa vörð um lántaka á víðsjárverðum tímum hárrar verðbólgu, þó að því sé statt og stöðugt haldið fram af þeim, sem njóta hagsmuna af því að halda henni óbreyttri. Nei, hér snýst hún einvörðungu um að treysta undirstöður stóru bankanna, auðvaldsins, á okkar kostnað. Bankarnir hafa dregið úr allri þjónustu. Þeir hafa markvisst fækkað starfsfólki, markvisst lokað útibúum á landsbyggðinni og í staðinn reist sér höfuðstöðvar og glerhallir í höfuðborginni.

Verðtryggingin er eins og hringrás sem við erum dæmd til að taka þátt í á meðan núverandi stjórnarfar ríkir. Þið sem eruð með þessi verðtryggðu lán, þið hafið ekkert val. Þegar milljarða hagnaði bankanna er ógnað, þá blæs Seðlabankinn til sóknar á heimili þessa lands og námsmenn. Svo lætur bankafólkið eins og þetta sé auðvitað allt okkur að kenna! Við séum að leyfa okkur of mikið, þenjum hagkerfið um of og verðum að taka afleiðingunum af því.

Og hvernig er okkur þá refsað?

Seðlabankinn hækkar snarlega stýrivexti til að reyna ná tökum á verðbólgunni. Áhrifin eru sem reiðarslag á lántakendur sem þegar eru að berjast í bökkum. Stýrivextir lækka svo ekki fyrr en að bankarnir eru farnir að skila meiri hagnaði aftur. Hin raunverulega ástæða þenslu hagkerfisins er m.a. vegna langvarandi skorts á húsnæði sem drífur upp húsnæðisverð og þar með verðbólguna, enda er húsnæðisliður vísitölu neysluverðs einn stærsti hluti mældrar verðbólgu.

Ég hvet ykkur til að skoða húsnæðis- og námslána greiðsluseðlana ykkar og skoða hvað raunafborgun ykkar er há, og svo vextina og verðbæturnar sem hlaðið er ofan á.

Flokkur fólksins ætlar sér að breyta þessu og draga húsnæðisliðinn út úr vísitölunni. Ef Flokkur fólksins nær sterku umboði kjósenda, ætlum við að koma á húsnæðislánakerfi að danskri fyrirmynd. Það er ekki innantómt loforð, við munum standa við það sem við segjum. Við það mun strax myndast stöðugleiki í húsnæðislánakerfinu, eitthvað sem allir landsmenn munu finna fyrir, ekki hvað síst þau sem eru verst stödd.

Unga fólkið okkar mun ekki lengur þurfa að flýja land og kerfið mun standa vörð um fólkið í landinu. Það hefur sennilega aldrei verið jafn mikilvægt að mæta á kjörstað, nýta rétt sinn og kjósa!

Höfundur skipar 3. sæti í Suðurkjördæmi fyrir Flokk fólksins í komandi Alþingiskosningum.