BRICS hét upprunalega BRIC og var nokkurs konar efnahagsbandalag Brasilíu, Rússlands, Indlands og Kína sem myndað var árið 2006 gegn hópum eins og G7 og G20. Suður Afríka bættist svo í hópinn árið 2010 og nafnið varð BRICS. Leiðtogar ríkjanna funda árlega og þetta árið bættust Íran, Egyptaland, Eþíópía og Sameinuðu arabísku furstadæmin við.
Sádi-Arabía hefur einnig tekið þátt í starfinu án þess að vera beinn meðlimur í BRICS.
Hugtakið var upprunalega samið innan veggja Goldman Sachs, samkvæmt frétt Reuters. Hópurinn inniheldur nú um 45 prósent íbúa heimsins og um 35 prósent af heimsframleiðslu.
Fréttaveitan hefur þó eftir manninum sem bjó hugtakið fyrst til að lítið tilefni sé fyrir jákvæðni vegna BRICS á meðan Kínverjar og Indverjar deila eins mikið og þeir hafa gert.
„Mér sýnist þetta árlegur fundur þar sem leiðtogar mikilvægra ríkja, og þá sérstaklega háværra ríkja eins og Rússlands og líka Kína, geta komið saman til að fagna því hve gott það sé að tilheyra hópi sem inniheldur ekki Bandaríkin og að stýringin á heimsvísu sé ekki nógu góð,“ sagði Jim O‘Neill.
Hafa lengi deilt sín á milli
Eins og segir í frétt New York Times hefur BRICS-ríkjunum sjaldan tekist að tala með einni röddu og má að miklu leyti rekja það til deilan Kínverja og Indverja.
Kínverjar vilja nota BRICS til að draga úr áhrifum Bandaríkjanna á heimsvísu og setja sig í leiðtogasæti fátækari ríkja heims. Indverjar vilja setjast í sama sæti en í senn ekki endilega draga úr áhrifum Bandaríkjanna.
Þá hafa Indverjar og Kínverjar deilt harkalega um landamæri ríkjanna um langt skeið.
Fyrr í vikunni komust ráðamenn í Kína og Indlandi að samkomulagi um eftirlit með sameiginlegum landamærum ríkjanna í Himalæjafjöllum, þar sem hermenn ríkjanna hafa barist reglulega með gaddakylfum og steinum á undanförnum árum.
Deilurnar snúast um Arunachal Pradesh hérað sem ríkin hafa lengi deilt um. Til stríðs kom á milli þeirra árið 1962 og unnu Kínverjar það með afgerandi hætti.
Árið 2020 kom svo til mannskæðra átaka á landamærunum og hafa samskipti Kína og Indlands verið við frostmark síðan þá.
Xi Jinping, leiðtogi Kína, og Narendra Modi, forsætisráðherra Indlands, héldu formlegan fund sín á milli í dag og var það í fyrsta sinn í fimm ár sem þeir gerðu það.
Úkraína nefnd einu sinni
Á fundinum í dag var farið um víðan völl. yfirlýsing fundarins í dag fjallaði meðal annars um fíkniefni, gervigreind, alþjóðastjórnmál og margt annað. Aðeins einu sinni var þó minnst á Úkraínu í yfirlýsingunni.
Þar kom fram að því væri tekið fagnandi að önnur ríki kæmu að því að reyna að koma á friði. Modi sagði Pútín á almannafæri í Kazan að hann vildi frið í Úkraínu en Pútín og Xi ræddu stríðið í einrúmi.
Einnig var fjallað um ný greiðslukerfi í heiminum, þar sem ekki væri notast við bandaríska dalinn en lítið var um smáatriði í yfirlýsingunni.
