Vísa á bug kenningu um að stjórnar­sam­starfið tóri á styrk­veitingum

Landsfundur Vinstri grænna lýsti því yfir um helgina að ríkisstjórnarsamstarfið sé að nálgast leiðarlok og kallaði eftir þingkosningum í vor, en ekki haust þegar kjörtímabilið klárarst. Þingflokksformaður Framsóknar hefur tekið undir þetta. Þingmaður Samfylkingar varpaði fram kenningu í gær hvað það er sem veldur að ríkisstjórnin ætli að tóra út kjörtímabilið:

„En samt, samt ætla þau að hanga saman, að minnsta kosti fram yfir 25. janúar þegar flokkarnir taka við ríkisstyrkjum upp á mörg hundruð milljóna,“ sagði Jóhann Páll Jóhannsson þingmaður Samfylkingarinnar í umræðu um störf þingsins í gær. 

Myndu tapa tugum milljóna 

Í lögum er kveðið á um árlega úthlutun úr ríkissjóði til stjórnmálasamtaka. Það framlag skiptist hlutfallslega milli flokka eftir atkvæðamagni í síðustu kosningum og er greitt út 25. janúar ár hvert.

VG fékk úthlutað rúmlega 87 milljónum króna á þessu ári og imiðast fjárhæðin við 12,6 prósenta fylgi þeirra í síðustu kosningum. Flokkurinn hefur undanfarið mælst með 3,5 til 4 prósenta fylgi og fengi þannig tæpar 25 milljónir ef gengið yrði til kosninga í dag.

Mest fær Sjálfstæðisflokkurinn - 158 milljónir - og Framsókn 115 milljónir. Ljóst er að framlögin myndu lækka töluvert ef litið er á núverandi fylgi. Sjálfstæðisflokkurinn mældist í síðasta Þjóðarpúlsi Gallup með 14 prósenta fylgi og fengi 87 milljónir. Framsókn mælist nú með sex prósenta fylgi og fengi 37 milljónir.

„Til að svara þessari spurningunni og þessum ásökunum eða samsæriskenningu öllu heldur, þá hafna ég henni alfarið. Ég get fullyrt að það hefur aldrei verið rætt á þennan hátt innan Sjálfstæðisflokksins,“ segir Hildur Sverrisdóttir þingflokksformaður Sjálfstæðisflokksins. 

„Þessi umræða sýnir fram á hversu vond þessi ríkisvæðing stjórnmálaflokka er. Framlög til stjórnmálaflokka hafa margfaldast og þetta sýnir að er ekki mjög farsæl þróun. Við í Sjálfstæðisflokknum erum á móti þessu, Diljá Mist Einarsdóttir hefur lagt fram frumvarp þar sem þessir styrkir eru lækkaðir.“

„Augljóst“ hvað haldi ríkisstjórninni saman

Orri Páll Jóhannsson þingflokksformaður VG vísar orðum Jóhanns Páls alfarið á bug. 

„Það gerði minn formaður, nýkjörinn, í öðru fjölmiðlaviðtali fyrir einhverju síðan. Ég er algjörlega sammála henni. Þetta finnst mér algjörlega fáránleg röksemdafærsla.“

Óli Björn Kárason, þingmaður Sjálfstæðisflokks, skrifaði í Morgunblaðið í morgun að útilokað sé að réttlæta áframhaldandi stjórnarsamstarf við VG.

„Ég er alla jafna sammála mínum góða vini Óla Birni, hann er einhvers konar samviska í flokknum. Ég held að við séum sammála um að þetta snýst um: Náum við hér að klára mál eða ekki?“ segir Hildur. 

„Skrif Óla Björns Kárasonar félaga míns koma mér ekkert á óvart. Þetta er sami tónn og ég hef lesið eftir hann á undanförnum misserum,“ segir Orri.

Hvað er það sem heldur ríkisstjórninni saman? 

„Það er alveg augljóst finnst mér og af svörum forystumanna flokkanna. Það eru ærin verkefni fram undan. Hér er stjórnarsáttmáli í gangi. Hér er þingmálaskrá. Hér eru verkefni sem blasa við öllum í samfélaginu sem lúta að því að ráða niðurlögum vaxta og verðbólgu.“