Í hendur Willums að fjár­magna frjóvgun í stað ó­frjó­semis­að­gerða

Þetta segir Hildur Sverrisdóttir, þingmaður Sjálfstæðisflokksins, í samtali við Vísi en hún tilkynnti það í skoðanagrein á Vísi að hún hefur fallið frá frumvarpi sínu um breytingu á lögum um tæknifrjóvgun. Í staðinn leggur hún það í hendur Willum Þórs Þórssonar heilbrigðisráðherra að hefja greiðsluþátttöku hins opinbera á tæknifrjóvgun hér á landi samhliða því að ófrjósemisaðgerðir verði ekki lengur gjaldfrjálsar eins og lagt var upp með í frumvarpinu. 

Í skoðanagrein sinni segist hún hafa fengið vilyrði frá Willum í svari hans við fyrirspurn á þinginu við fjárlagaumræðu á dögunum um að endurskoða greiðsluþátttöku vegna tæknifrjóvgana.

„Kjarni máls er að það skiptir fólk í þessari stöðu akkúrat engu máli hvort það sé ég eða Willum Þór sem að stígum formlega þau skref sem þarf að stíga svo aðstaða þeirra batni í þessari erfiðu stöðu sem að tæknifrjóvgunarmeðferð er. Fyrst að Willum tók svona vel í upplegg mitt að leysa málið þá er farsælla að við séum ekki að dreifa kröftunum og ég fel honum að klára þetta.“

Eldri arfleið sem sé út úr kú

„Að baki frumvarpinu bjó sú hugsun að óeðlilegt sé að niðurgreiða að fullu valkvæðar ófrjósemisaðgerðir, í daglegu tali nefndar herraklippingar, á meðan fólk sem á í erfiðleikum með að eignast barn þarf að bera af því mikinn og oft sligandi kostnað.

Í ljósi hækkandi lífaldurs þjóðarinnar samhliða lækkandi fæðingartíðni er eðlilegt að við sem samfélag forgangsröðum fjármunum hins opinbera í að styðja við fólk á vegferð sinni að foreldrahlutverkinu,“ segir í grein Hildar.

Hún segir það skjóta skökku við að ófrjósemisaðgerðir karlmanna séu niðurgreiddar að öllu leyti á meðan að tæknifrjóvganir séu rándýrar. 

„Í öllu falli er þetta einhver eldri arfleið sem er í besta falli algjörlega út úr kú miðað við alla aðra greiðsluþátttöku af hendi hins opinbera í heilbrigðiskerfinu. Þar sem að þessi niðurgreiðsla er 100 prósent, það er valfrjáls ófrjósemisaðgerð eldri karlmanna. Mér finnst ekki erfitt, með fullri virðingu fyrir þeim aðgerðum, að forgangsröðun hins opinbera setji spurningarmerki við og reyni að hafa þetta sanngjarnara eins og ég hef lagt til í frumvarpinu .“

Vonast til að mynda nýja tískubylgju á þingi

Hildur segir þetta vera góða lausn á málinu enda um verðbólgutíma að ræða og því eðlilegt að hennar mati að gerð sé sú krafa að vandinn sé ekki leystur með auknum ríkisútgjöldum eða aukinni skattheimtu, heldur frekar hagkvæmri nýtingu á fjármunum sem nú þegar séu til staðar. 

Hún vonast til þess að með þessari lausn búi hún til „tískubylgju“ fyrir þingheimi þar sem er hagræðingartillaga í frumvörpum sem kveða á um aukin útgjöld þar  í stað þess að auka útgjöld ríkisins sífellt. 

„Því miður er það sjaldséð á þinginu að frumvörpum fylgi fjármögnunartillögur. Ef slíkar tillögur fylgja snúa þær iðulega að skattahækkunum frekar en hagræðingu eða betri forgangsröðun opinbers fjármagns. 

Ég vona að fleiri þingmenn sýni slíka ábyrgð í verki þegar þeir koma fram með mál með útgjaldatillögum fyrir ríkissjóð en samkvæmt mínum heimildum er þetta í fyrsta skipti í sögu Alþingis að frumvarp með útgjaldatillögu sé fjármögnuð með hagræðingartillögu í sama frumvarpi.“

Vongóð um að Willum muni standa við þetta

Hún fagnar því að heilbrigðisráðherra hafi tekið vel í þessa tillögu. 

„Þetta eru mikil gleðitíðindi fyrir fólk sem stendur í tæknifrjóvgun og í reynd samfélagið allt, sem á enda mikið undir því að ungt fólk haldi áfram að eignast börn. Það er gaman þegar stjórnmálin virka sem skyldi og þörf og mikilvæg mál fá framgöngu hjá ráðherrum því það er staðreynd þingheimsins að mál eru vænlegri til árangurs ef þau eru í fangi ráðherra frekar en þingmanna,“ segir Hildur.

Hildur segist vongóð um að Willum muni standa við stóru orðin og segir boltann vera hjá honum. Hún muni fylgjast ströng en spennt með næstu skrefum hans á þessari vegferð.

„Ég held að þetta sé bara eitthvað sem ætti að leysast og ég hef einlæga trú á því að Willum muni klára þetta, hann talaði þannig. Nú fær hann þetta verkefni og ég hvet hann til dáða.“