Haukur frá­bær í öruggum sigri Búkarest

Haukur hefur leikið vel með Búkarest það sem af er tímabili og þar var engin breyting á þegar liðið mætti til leiks í kvöld. Heimamenn tóku völdin snemma leiks og voru alltaf skrefi á undan.

Undir lok fyrri hálfleiks bættu þeir í og voru sex mörkum yfir í hálfleik. Það verður seint sagt að gestirnir hafi átt mikið í heimaliðið í síðari hálfleik og lauk leiknum með níu marka sigri Búkarest, lokatölur 34-25.

Haukur skoraði fjögur mörk og gaf fjórar stoðsendingar. Aðeins Ali Ismail Mohamed kom að jafn mörgum mörkum í liði Búkarest en hann skoraði fimm og gaf þrjár stoðsendingar. Miklos Rosta var þó markahæstur með sjö mörk.

Búkarest hefur nú jafnað Sporting að stigum á toppi A-riðils en bæði lið eru með fullt hús stiga eftir þrjár umferðir.

Fredericia tapaði með sex marka mun gegn Füchse Berlín, lokatölur 32-38. Einar Þorsteinn Ólafsson skoraði þrjú mörk í liði heimamanna og Arnór Viðarsson bætti við einu marki. Lærisveinar Guðmundar eru á botni riðilsins án stiga.

Þá skoraði Janus Daði Smárason eitt mark þegar lið hans Pick Szeged vann dramatískan eins marks sigur á Nantes í B-riðlinum, lokatölur 33-32. Janus Daði og félagar eru nú í 2. sæti með fjögur stig að loknum þremur umferðum.