„Banna mér al­farið að hugsa um föt sem karla- og kvennaföt“

Tískutal er fastur liður á Vísi þar sem rætt er við ólíka einstaklinga um þeirra persónulega stíl og hvernig tíska nýtist þeim í daglegu lífi. Klæðaburður er sannarlega fjölbreytt listform en við fáum að skyggnast inn í ólíka fataskápa og fræðast nánar um það merkilega tjáningarform sem tíska er fyrir hverjum og einum viðmælanda.

Hvað finnst þér skemmtilegast við tískuna?

Að hún getur verið framlenging af manni sjálfum. Mér finnst svo spennandi að maður getur miðlað ákveðnum hugmyndum út frá klæðaburði sem að eru hluti að einhverju stærra samhengi.

Ég held að það sé kannski ekki heilbrigt að vera alltaf að pæla í því hvaða skilaboð maður sjálfur er að senda með klæðaburðinum sínum eða hvernig aðrir eru að lesa úr því. 

En möguleikinn að geta gert það á völdum augnablikum, sérstaklega þegar maður er tónlistarmaður, er eitthvað sem mér finnst spennandi.

Hver er uppáhalds flíkin þín og af hverju?

Ég keypti nýlega trylltan, handmálaðan bomber jakka í B12 Space á Bankastræti. Ég hef verið í honum nánast daglega frá því að ég keypti hann. Ég elska föt sem eru með sérstakri áferð og gat hreinlega ekki skilið við hann í búðinni.

Eyðirðu miklum tíma í að velja föt hverju sinni?

Alveg talsverðum tíma. Ég reyni að taka eins meðvitaðar ákvarðanir og ég get og kaupa sem minnst nýtt. 

Ég elska góð vintage kaup og eyði miklum tíma í að leita uppi gersemar á nytjamörkuðum. Ef ég kaupi eitthvað nýtt þá er það oftast af minni fatahönnuðum sem eru að selja sitt eigið stuff á sölusíðum á borð við Depop og Grailed.

Hvernig myndirðu lýsa stílnum þínum?

Örugglega bara „genderfluid“.

Hefur stíllinn þinn breyst mikið í gegnum tíðina og hvernig þá?

Já ekkert smá! Ég hef gengið í gegnum alls konar tímabil þegar kemur að fatastíl. Eins og flestir þá mátaði ég á mig alls konar týpur í menntaskóla. Þegar ég flutti síðan til Berlínar eftir menntaskólann þá varð ég algjör minimalisti.

Ég átti minna en 10 flíkur, allar svart-hvítar og frekar dannaðar. Síðan eftir að ég byrjaði að gefa út tónlist og spila út um allt tók fataskápurinn miklum breytingum. 

Ég fór að kaupa mun meira „flashy“ flíkur sem að ég vissi að myndu líta vel út á sviði og það hefur síðan smitast inn í hversdags klæðnaðinn.

Nýturðu þess að klæða þig upp?

Ég geri það upp að ákveðnu marki. Þegar ég er að spila þá fer ég all out og legg mikinn metnað í fatavalið, förðunina og heildarlookið. 

En svona dags daglega þá er ég ekkert mikið að klæða mig upp. Sérstaklega út af því að ég er að læra samtímadans við LHÍ og þar er maður bara sveittur í jogginggallanum allan daginn.

Hvaðan sækirðu innblástur í tískunni?

Ég lít mikið upp til ballroom-senunnar bæði vestanhafs og í Evrópu. Bæði tónlistin mín og fatastílinn minn er mikið innblásinn af þeirri senu. 

Ég lít líka mikið upp til tónlistarmanna sem hafa notað tísku til upphefja tónlistina sína, eins og t.d. David Bowie, Prince, Madonna og FKA twigs.

Ertu með einhver boð og bönn þegar það kemur að klæðaburði?

Ég banna mér alfarið að hugsa um föt sem karla- og kvennaföt. Ef að mér finnst eitthvað flott þá finnst mér það flott! 

Svona 50% af fataskápnum mínum myndi örugglega flokkast sem kvenmannsföt.

Hver er eftirminnilegasta flík sem þú hefur klæðst og af hverju?

Þegar ég gaf út plötuna mína EITT fyrr á árinu gerði ég kynningarmyndbönd til að auglýsa. Í þeim var ég í Victor Clavelly topp, Entire Studios pleður buxum og Syro hælaskóm. 

Síðan þá hef ég spilað nokkrum sinnum í þessu sama outfitti og mér líður alltaf eins og einhverri ofurhetju, á góðan hátt!

Býrðu yfir einhverju góðu ráði þegar það kemur að tísku?

Tíska er huglæg. Ekki taka henni of alvarlega!