Krefjandi golf­völlur í ó­venju­legri náttúru­fegurð

Í sumar ætlum við að kynnast nokkrum af þeim fjölda spennandi golfvalla sem hægt er að finna víða um land og gaman væri að prófa í sumarfríinu en hægt er að leika golf á yfir 60 völlum hér á landi. Haukadalsvöllur við Geysi er golfvöllur vikunnar á Vísi.

„Haukadalsvöllur er, eins og margir golfvellir hér á landi, einstakur á sinn hátt. Kylfingar heillast þó sennilega flestir af náttúrufegurð vallarins, nálægðinni við árnar Almenningsá og Beiná sem renna í gegnum völlinn og nálægðinni við Geysi í Haukadal,“ segir Einar Tryggvason, einn eigenda Haukadalsvallar.

Tekið tillit til náttúrunnar við hönnun vallarins

Einar segir að þegar staðið er á fyrsta teig, þá láti völlurinn lítið yfir sér en kylfingar ættu ekki að láta það plata sig. „Fallegt umhverfið kemur strax í ljós á annarri holu og þegar komið er að annarri flöt þá opnast glæsilegt svæði þar sem Almenningsá spilar stórt hlutverk í golfleiknum. Edwin Roald Rögnvaldsson er hönnuður vallarins en við hönnun hans var tekið tillit til náttúrunnar og umhverfisins og er lega vallarins eins líkust umhverfinu og það var áður en framkvæmdir hófust.“

Hann segir völlinn vera mjög krefjandi, ekki aðeins vegna ánna, heldur einnig vegna lynggróðurs og birkikjarrs sem einkennir svæðið. „Það má síðan deila um hvaða brautir standi upp úr, en báðar par 3 holurnar þykja einstakar sem og önnur holan, þar sem innáhöggið inn á flöt er yfir Almenningsá sem rennur í flatarkantinum. Þar reynir á kylfinginn, eins og reyndar víðar á vellinum, sem flestir kunna að meta. Á Haukadalsvelli kemst kylfingurinn nefnilega ekki upp með annað en góðan golfleik frá upphafi til enda.“

Völlurinn er 5.694 m á gulum teigum, 4.706 m af rauðum teigum, par 72.

Fjölbreytt þjónusta í boði

Einar segir kylfinga koma víða að og margir geri sér ferð á Geysi til að spila golf. „En flestir eiga sennilega sammerkt að vera á ferð í nágrenninu, erlendir ferðamenn, Íslendingar í sumarhúsum eða á tjaldsvæðum, nú eða gistigestir á Hótelunum hér á Geysi, Hótel Geysir og Hótel Litli-Geysir.“

Ýmis þjónusta er í boði við golfvöllinn og á svæðinu kringum Geysi. „Eins og einhver orðaði það, á Geysi er allt á sama blettinum í innan við golfhöggs færi.“

Púttflötin er við fyrstu teiga og þar er hægt að vippa og æfa stutta spilið. Í klúbbhúsinu, Litli Geysir hótel, stendur valið um drykki og léttar veitingar og auðvitað allt það helsta sem þarf til golfleiksins, t.d. golfboltar, tí, flatargaflar, hanskar, leigusett og kerrur, ásamt ýmsum vörum sem eru merktar golfvellinum.

„Klúbbhúsið er síðan staðsett við hliðina á einu glæsilegasta hóteli landsins, Hótel Geysir, með sinn rómaða veitingastað og frábæru gistingu og enn fleiri veitingastaðir eru í Geysir Center ásamt fata-og minjagripaverslun. Þá er enn ótalið tjaldsvæðið á Geysi, Hverasvæðið, Haukadalsskógur og ýmislegt fleira.“

Hægt er að bóka rástíma í gegnum vefinn hotelgeysir.is og eins á golfboxinu.

Vefur golfvallarins, geysirgolf.is verður svo kominn í gagnið fyrir næsta vor.