Þor­steinn: Mér finnst reyndar margir þeirra sem tjá sig ekki hafa hunds­vit á kvennafótbolta

Liðið var gagnrýnt fyrir t.a.m. leikinn á móti Þýskalandi á síðasta ári sem tapaðist og var Þorsteinn spurður að því hvort eitthvað hafði breyst í millitíðinni.

„Við höfum náttúrlega bara þróast sem lið og vorum gagnrýnd mikið eftir þennan Þýskalands leik sem var lélegur. Öll lið geta átt lélega leiki en mér fannst gagnrýnin ´23 mjög skrýtin á köflum. Mér fannst liðið alltaf vera að þróast í rétta átt og við náðum í góð úrslit alveg fram að því þegar Þjóðardeildin byrjar. Við vorum búin að ná í góð úrslit í öllum þessum æfingaleikjum en töpum á móti Finnum hérna heima sem var okkar slakasti leikur en fórum svo til Austurríkis og vinnum þar.“ 

„Síðan byrjar Þjóðardeildin og auðvitað tók tíma að þróa liðið og við höfum unnið ötullega að því með öllu fólkinu í kringum þetta. Stelpurnar hafa tekið skref hægt og róleg fram á við. Við erum bara að verða betri sem lið smáma saman og það er ekkert óeðlilegt að það taki smá tíma eftir allar breytingarnar sem hafa orðið.“

Þorsteinn var þá spurður að því hvort gagnrýnin hafi haft einhver áhrif á hann og hvort það hafi verið gott að svara svona eins og í dag.

„Þetta er eina svarið sem þú í raun getur gefið. Vinna Þýskaland 3-0 og fara beint á EM. Síðan geta allir gagnrýnendurnir borðað skítuga sokka. Maður hefur lært það í gegnum tíðina það að vera landsliðsþjálfari þýðir að það er mikil gagnrýni. Ég er ekki á Twitter og fylgist ekki með samfélagsmiðlum og les ekkert eftir leiki. Ég reyni að útiloka þetta allt saman. Ég veit alveg að það er gagnrýni í þessu og veit hvað er í gangi en mér finnst reyndar margir af þeim sem eru að tjá sig ekki hafa hundsvit á kvennafótbolta.“

Þorsteinn viðurkenndi það að það væri pressa að landsliðsþjálfari en sagðist aldrei hafa fundið fyrir pressu frá sambandinu.

„Það er bara pressa að vera landsliðsþjálfari, það fylgir starfinu og þú þarft að standa þig. Það var samt aldrei pressa héðan frá. Pressan er bara það að vera landsliðsþjálfari en auðvitað voru það vonbrigði að komast ekki á HM. Við getum ekki falið það en nú erum við komin á EM.“ 

„Við þurfum að halda áfram að þróast sem lið en eitt í þessu er að við eigum Pólland á þriðjudaginn. Það er mikilvægur leikur því við getum unnið riðilinn. Stigafjöldinn skiptir máli upp á röðunina þegar dregið er í riðilinn. Á EM ´22 munaði hálfu stigi á okkur og Austurríki hvor væri í þriðja styrkleikaflokki. Við erum komnar upp fyrir þær allavega og einhver lið en Sviss færi náttúrlega eitt sæti. Þær eru í fyrsta styrkleikaflokki og svo koma næstu sjö lið sem raðast í efstu tvo styrkleikflokkana og ég veit ekki röðunina en ég held að við þurfum að vinna í Póllandi til að vera örugg í þriðja styrkleikaflokki. Það er markmiðið í dag að fara til Póllands og vinna þar.“