Ekki náttúru­spjöll heldur for­varnir

Einhverjir Fáskrúðsfirðingar hnutu um þennan gjörning og fréttastofu bárust nafnlaus skilaboð um að íbúa á svæðinu þætti athæfi rokkaranna ekki ásættanlegt. Íbúinn nafnlausi sagðist þykja það sorglegt að farið væri með íslenska náttúru á þennan hátt og birt á samfélagsmiðlum fyrir aðra að apa eftir.

Jakob Kristjánsson Norðfirðingur og gítarleikari hljómsveitarinnar er þó ekki sammála.

„Ég skal segja þér eitt, þessi steinn hefði fokið niður í næsta vondviðri. Hann var alveg laus. Við rétt bara ýttum við honum og hann datt niður,“ segir hann í samtali við fréttastofu.

Hætta stafi af óstöðugu grjóti

Hann segir að hnullungarnir hefðu þegar verið búnir að brotna frá klöppinni og héngu utan á henni á því sem næstum mætti kalla bláþræði, nema úr steini. Hann vildi meina að það væri ágætt að einhver fengi að verða þess að minnsta kosti aðnjótandi að sjá steininn hrynja fram af hamrinum. Hann hefði hvort eð er gert það þegar frysi í vetur og þiðnaði svo á ný þegar voraði.

Elísabet Mörk Ívarsdóttir söngvari hljómsveitarinnar er sjálf Fáskrúðsfirðingur bætir líka við í samtali við fréttastofu að af óstöðugum hnullungum stafi hætta þar sem svæðið er vinsæll áfangastaður ferðamanna jafnt sem innfæddra þar sem fallegt útsýni er yfir hafið og eyjuna Skrúð þaðan sem myndbandið er tekið.

Miðað við hvað grjótið var laust hefði það hrunið hvort eð er þegar vetraði og Elísabet bendir á að fyrir þremur árum hafi kona í fjallgöngu á svæðinu orðið undir slíkum hnullungi með þeim afleiðingum að hún lést.

Þriðja sæti í Músíktilraunum

Hljómsveitin Chögma er að sögn Jakobs framsækin þungarokkshljómsveitt með séraustfirsku ívafi. Hún keppti í Músíktilraunum í vor og hafnaði í þriðja sæti keppninnar. Jakob segir þennan árangur hafa gefið hljómsveitinni mörg tækifæri.

„Það gaf okkur fullt af tækifærum til að spila fleiri gigg. Við vorum að spila í Reykjavík núna síðustu helgi. Það var rosa skemmtilegt og við fengum góða reynslu af því,“ segir Jakob.

Chögma er með tónleika skipulagða á Fáskrúðsfirði og Seyðisfirði á næstunni og spilar einnig á tónlistarhátíðinni LungA sem fer fram á Seyðisfirði helgina 19. til 21. júlí.

Sveitin er rammaustfirsk og allir meðlimir hennar eru að austan. Hún var stofnuð fyrir um hálfu ári og hafði aðeins komið einu sinni fram þegar hún keppti í Músíktilraunum. Hljómsveitina skipa þau Jakob Kristjánsson, sautján ára gítarleikari úr Neskaupstað, Jónatan Emil Sigþórsson, nítján ára trommuleikari úr Stöðvarfirði, Kári Kresfelder Haraldsson, 21 árs hljómborðsleikari úr Neskaupstað, Elísabet Mörk, átján ára söngkona frá Fáskrúðsfirði og Stefán Ingi Ingvarsson, 24 ára bassaleikari frá Norðurfirði.

„Gott bull sem hljómar vel“

Margir hnjóta eflaust um nafn hljómsveitarinnar sem er óvenjulegt. Hugtakið tsjögga er þungarokksáhugamönnum kunnugt en það á við um það þegar þeir spila með djúpa E-strenginn dempaðan.

„Við vitum ekkert hvað Chögma þýðir, þetta er gott bull sem hljómar vel,“ hafði Jakob að segja um nafnið í samtali við Austurfrétt fyrr á árinu.

Stafsetninguna vildu þau íslenskuvæða með ö-inu en fannst tsj vera aðeins of langt gengið og héldu í ensku stafsetninguna hvað það varðaði.

Jómfrúarbreiðskífan í haust

Jakob segir hljómsveitarmeðlimina hafa kynnst í hinum og þessum sundlaugum á Austfjörðunum og segir sundið vera „heila málið.“

Hljómsveitin stefnir á að gefa út sína jómfrúarbreiðskífu á þessu ári og segist Jakob vona að hún komi út fyrir jól. Þau hafi þegar samið öll lögin en við taki langt ferli að læra hvernig maður hljóðblandar og -jafnar.

„Nóg af YouTube-i til að læra,“ segir Jakob.