Mættu ríðandi í skólann

Það var góð stemming í morgun þegar allir höfðu lagt á bak á bæjunum og héldu ríðandi í skólann á fákum sínum. Hugmyndin kom frá þeim Benóný Ágústssyni og Magnúsi Ögra Steindórssyni, nemendum.

„Þetta er bara sniðugt og gaman að brjóta daginn upp með þessum hætti,” segir Benóný.

Er Flóaskóli góður skóli?

„Jú, jú, hann er helvíti góður,” segir Magnús Ögri.

„Strákarnir komu og töluðu við mig en þeir eru í nemendaráði hjá okkur. Þeir töluðu við mig í haust og spurðu hvort það væri ekki möguleiki að koma á hesti í skólann einn dag og mér fannst það bara frábær hugmynd og svo þróaðist þetta svona og við gerðum þetta að fjölskyldudegi,” segir Þórunn Jónasdóttir, skólastjóri Flóaskóla.

Og er mikill hestaáhugi í skólanum eða hvað?

„Já, alveg hjá stórum hópi en það er náttúrulega mikið af hestum hér í Flóanum, mikið af góðum hestum,” segir Þórunn.

Og krökkunum fannst frábært að mæta á hesti í skólann.

„Mér finnst hestar eiginlega bestu dýrin, þeir eru uppáhalds dýrið mitt,” segir Sóley Lindsay, 8 ára og vinkona hennar, Lilja Reynisdóttir, 9 ára tók undir það með henni.

Lilja var á merinni Golu en Sara var ekki viss með nafnið á hestinum sínum.

En Flóaskóli, er það ekki frábær skóli?

„Já, þetta er besti skólinn, sem við höfum verið í lífinu,” sögðu þær í kór.

Og einn og einn afi tók líka þátt í reiðinni.

„Ég dáist að skólastjóranum að taka svona vel í þessa hugmynd hjá strákunum og koma þessu í verk, það er alveg yndislegt,” segir Baldur Indriði Sveinsson á Litla Ármóti í Flóahreppi.