FIFA byrjað að vinda ofan af um­bótum eftir spillingar­hneykslið

Alþjóðaknattspyrnusambandið FIFA var niðurlægt þegar sjö embættismenn þess voru handteknir í Zürich í Sviss rétt fyrir aðalþing þess árið 2015. Handtökurnar voru gerðar í tengslum við rannsókn bandarískra yfirvalda á spillingu innan FIFA sem tengdist meðal annars mútugreiðslum frá rétthöfum sjónvarpsútsendinga og úthlutun heimsmeistaramóta.

Málið varð Sepp Blatter, þáverandi forseta FIFA, að falli. Í stað hans kom Gianni Infantino, embættismaður FIFA, sem var á meðal höfunda skýrslu um umbætur sem sambandið þyrfti hrinda í framkvæmd til þess að bjarga andliti eftir hneykslið.

Á meðal þess sem var lagt til voru takmörk á hversu lengi æðstu stjórnendur gætu setið í embætti, takmörk á vald forseta FIFA og að aragrúa nefnda sem spilling loðaði við yrði fækkað verulega.

Afnema hámarks embættissetu og fjölga fastanefndum aftur

Nú segir New York Times frá því að FIFA og álfusambönd innan þess séu búin að setja í bakkgír og byrjuð að vinda ofan af ýmsum þeim breytingum sem áttu að fyrirbyggja spillingu og bæta stjórnarhætti.

Infantino og FIFA leggja þannig til á þingi sambandsins sem fer fram í Bangkok í Taílandi á föstudag að fjölga fastanefndunum sem var fækkað eftir spillingarmálið þrátt fyrir að þær hafi verið taldar einn vettvangur versta óhófsins innan sambandsins. Alþjóðlegir knattspyrnuleiðtogar sem áttu sæti í 26 fastanefndum á sínum tíma ferðuðust þannig um heiminn í einkaþotum, gistu á lúxushótelum og þáðu fyrir himinhá laun.

Tillagan nú felur í sér að nefndunum fjölgi fimmfalt, úr sjö í 35. Infantino fái jafnframt heimild til þess að stofna nýjar nefndir og skipa nefndarmenn.

Álfasamböndin virðast einnig síga í sama farið aftur. Asíska knattspyrnusambandið samþykkti að afnema takmörk á hversu lengi æðstu stjórnendur geta setið þannig að forseti og stjórnarmenn geta haldið áfram ótímabundið.

Aleksander Ceferin, forseti Knattspyrnusambands Evrópu, fékk reglum sambandsins breytt til þess að geta setið lengur en tólf ár á forsetastóli en ákvað síðan að bjóða sig ekki fram aftur eftir allt saman.

Knattspyrnusamband Norður-Ameríku og Karíbahafs, sem var í þungamiðju spillingarmálsins á sínum tíma, hefur ekki fylgt eftir loforðum um umbætur eins og að fá óháða stjórnarmenn.

Ákvarðanir teknar í fámennri kreðsu

Infantino, sem stillti sér upp umbótamanni eftir fall Blatter, hefur tvöfaldað laun sín frá því að hann tók við embætti forseta FIFA. Þau nema nú nærri fimm milljón, jafnvirði tæpra 700 milljóna íslenskra króna. Hann fékk einnig reglum breytt til að hann gæti verið forseti í fimmtán ár í staðinn fyrir tólf.

Völdin innan FIFA hafa einnig færst á æ færri hendur í tíð Infantino. Hann og sex manna ráð forseta álfusambandanna skrafa nú um meiriháttar ákvarðanir á bak við luktar dyr. Saman lögðu þeir fram tillögur síðasta haust sem færðu Sádi-Arabíu heimsmeistaramótið 2034 í raun á silfurfati.

Sádar standa nú í umfangsmiklum fjárfestingum í knattspyrnu og öðrum íþróttum til þess að hvítþvo ímynd sína á alþjóðavettvangi.

FIFA sagði New York Times að það væri alls ekki sammála gagnýnendum sem héldu því fram að sambandið að nýlegar breytingar grafi undan umbótunum sem voru gerðar. Fullyrti sambandið að bandaríska dómsmálaráðuneytið, sem rak málið gegn sambandinu á sínum tíma, hefði viðurkennt árangurinn af þeim umbótum sem ráðist var í eftir hneykslið. 

Talsmaður saksóknaraembættisins sem fór með málið sagði bandaríska blaðinu þó að það hefði hvorki vottað aðgerðir FIFA né farið yfir þær.