Lands­liðið til Lúxem­borgar en þrjár urðu eftir á Ís­landi

Sextán leikmenn verða í hópnum á miðvikudag og Arnar Pétursson landsliðsþjálfari varð því að skilja þrjá leikmenn eftir úr æfingahópnum sem valinn var, fyrir leikina við Lúxemborg á miðvikudag og Færeyjar næsta sunnudag.

Þær Steinunn Björnsdóttir úr Fram, Sara Sif Helgadóttir úr Val og Katrín Anna Ásmundsdóttir úr Gróttu urðu eftir á Íslandi. Þær gætu þó mögulega komið inn í hópinn sem mætir Færeyjum á Ásvöllum á sunnudaginn.

Ísland á góða möguleika á að komast á sitt annað stórmót í röð en það ræðst þó ekki endanlega fyrr en í leiknum við Færeyjar á sunnudag sem verður úrslitaleikur um 2. sæti riðils Íslands. Tapliðið í þeim leik gæti þó mögulega komist á EM sem eitt af fjórum bestu liðunum í 3. sæti, í undanriðlunum átta.

Ísland er með fjögur stig eftir sigra gegn Lúxemborg og Færeyjum í október, og tvö töp gegn Svíum fyrir mánuði síðan. Svíar eru með átta stig, Færeyjar og Ísland fjögur stig, en Lúxemborg án stiga.

Stelpurnar okkar flugu af stað til Brussel í morgun og þaðan er rútuferð til Lúxemborgar fyrir æfingu síðdegis í dag. Leikurinn við Lúxemborg hefst klukkan 16:45 á miðvikudagskvöld.

Leikmannahópur Íslands gegn Lúxemborg er þannig skipaður:

Markverðir:

Elín Jóna Þorsteinsdóttir, EH Aalborg (57/2)

Hafdís Renötudóttir, Valur (56/3)

Aðrir leikmenn:

Andrea Jacobsen, Silkeborg-Voel (50/75)

Berglind Þorsteinsdóttir, Fram (24/5)

Díana Dögg Magnúsdóttir, BSV Sachsen Zwickau (50/68)

Elín Rósa Magnúsdóttir, Valur (17/39)

Elín Klara Þorkelsdóttir, Haukar (10/17)

Elísa Elíasdóttir, ÍBV (13/11)

Jóhanna Margrét Sigurðardóttir, Skara (13/10)

Katrín Tinna Jensdóttir, ÍR (18/6)

Lilja Ágústsdóttir, Valur (22/15)

Perla Rut Albertsdóttir, Selfoss (46/85)

Sunna Jónsdóttir, ÍBV (88/64)

Thea Imani Sturludóttir, Valur (76/168)

Tinna Sigurrós Traustadóttir, Selfoss (2/1)

Þórey Rósa Stefánsdóttir, Fram (135/391)

Þess má geta að Katla María Magnúsdóttir er meidd og Þórey Anna Ásgeirsdóttir gaf ekki kost á sér í æfingahópinn að þessu sinni.