„Við eigum bara úrslitaleiki eftir“

„Annars hefði þetta verið búið. Það er nóg eftir enn og þeir eru með innbyrðis á okkur og ég held að Tindastóll hafi unnið. Þetta er gríðarlegur léttir því þetta hefði eiginlega verið farið ef við hefðum ekki unnið hér í kvöld,“ sagði Arnar í samtali við Vísi eftir leikinn í kvöld.

Leikurinn var jafn og spennandi allan tímann í dag. Stjörnumenn voru yfirleitt hænufeti á undan og Arnar var ekki ánægður með varnarleikinn í fyrri hálfleiknum þar sem gestirnir skoruðu 50 stig. Hann sagðist eingöngu hafa rætt varnarleik í hálfleikspásunni.

„Þeir gerðu líka bara vel og skutu boltanum mjög vel. Þetta er hörkulið og erfitt við þá að eiga. Það verður erfitt verkefni að reyna að ná þeim fyrir úrslitakeppnina.“

Stjörnumenn eru nú jafnir Hetti að stigum í Subway-deildinni. Höttur á eftir fjóra leiki, Stjarnan þrjá og Austanmenn eru með yfirhöndina í innbyrðisleikjum félaganna.

„Við eigum bara úrslitaleiki eftir. Við eigum Álftanes í næstu viku og svo bikarhelgi eftir það. Við vorum svo sem búnir að setja þessa leiki sem við höfum tapað sem úrslitaleiki en við þurfum bara að reyna að finna leiðir til að vinna leiki. Það er það eina sem skiptir máli.“

Dagur Kár Jónsson og Arnþór Freyr Guðmundsson voru ekki með Stjörnunni í dag vegna meiðsla. Dagur Kár verður ekki meira með á tímabilinu og þá meiddist Júlíus Orri Ágústsson í leiknum í dag þegar hann lenti illa á öxlinni.

„Ég held að Júlli sé allt í lagi. Hann er búinn að vera veikur alla vikuna og svo fékk hann þetta í ofanálag. Hann sagði við mig að hann gæti komið aftur inn á en ég ákvað að taka ekki sénsinn á því. Addú er bara í þessu heilahristingsdæmi og ég veit ekki meira um það. Ég held að Júlli verði fínn en ég veit ekki með Addú,“ sagði Arnar Guðjónsson að lokum.