Innlent

Fagna nýju frum­varpi um Þjóðaróperu

Lovísa Arnardóttir skrifar
Gissur Páll Gissurarson, óperusöngvari, er einn þeirra sem skrifar undir yfirlýsinguna. 
Gissur Páll Gissurarson, óperusöngvari, er einn þeirra sem skrifar undir yfirlýsinguna.  Stöð 2

Fagfélag klassískra söngvara á Íslandi, Klassís, fagnar þeim merka áfanga í sögu sönglistar á Íslandi að fram sé komið frumvarp um Þjóðaróperu. Félagið lýsir eindregnum stuðningi við áform Lilju D. Alfreðsdóttur, viðskipta- og menningarráðherra, í frumvarpinu.

Undir yfirlýsinguna skrifa þau Andri Björn Róbertsson, gjaldkeri, Edda Austmann Harðardóttir, meðstjórnandi, Gissur Páll Gissurarson, talsmaður og kynningarfulltrúi, Guja Sandholt, meðstjórnandi og Þóra Einarsdóttir, formaður.

„Klassís bindur miklar vonir við að frumvarp þetta verði að lögum sem fyrst. Enda hefur það lengi verið eitt helsta keppikefli innan óperugeirans á Íslandi að tryggja starfsgrundvöll söngvara eða allt frá því að Ragnhildur Helgadóttir lagði fram þingsályktunartillögu um fastráðningar söngvara við Þjóðleikhúsið fyrir tæpum 70 árum,“ segir í yfirlýsingu frá félaginu.

Þá fagnar félagið því einnig að með frumvarpinu verði óperulistin lögbundið sviðslistaform til jafns við leiklist og danslist.

„Með samlegð við Þjóðleikhús skapast grundvöllur til samfelldrar starfsemi, fastráðninga söngvara, fjölbreyttra atvinnutækifæra fyrir söngvara og ýmsa aðra hópa listamanna og spennandi möguleikar til nýsköpunar og framþróunar óperulistformsins, sem mun loks njóta jafnræðis á við leiklist og danslist.“

„Einhvern tímann þurftum við að taka þetta skref,“ sagði Lilja Alfreðsdóttir menningar- og viðskiptaráðherra um fyrirhugaða Þjóðaróperu í Kvöldfréttum Stöðvar 2 í gær. Ráðuneyti hennar birti í gær í samráðsgátt stjórnvalda frumvarpsdrög um stofnun Þjóðaróperu.

Áformað er að Þjóðarópera taki til starfa innan Þjóðleikhússins og óskað eftir því að varanlegt fjármagn til óperustarfsemi aukist um 600 milljónir króna áföngum og verði samtals 800 milljónir króna árlega að núvirði frá og með árinu 2028.

Menningarslys

Pétur J. Eiríksson stjórnarformaður Íslensku óperunnar gagnrýndi framkvæmdina í viðtali við Vísi í gær. Sagði hann meðal annars að ríkisstjórnin hafi ekki lagt til nægt fjármagn svo að hægt væri að halda starfi Íslensku óperunnar áfram þar til Þjóðarópera yrði stofnuð.

Íslenska óperan Leikhús Ríkisstjórn Katrínar Jakobsdóttur Menning Þjóðaróperan

Tengdar fréttir

Sundrung og sam­skipta­leysi hafa staðið Óperunni fyrir þrifum

„Slysið er ef Íslenska óperan er lögð af vegna fjárskorts áður en framtíðin hefur verið mótuð og það myndast þarna eyða í starfseminni sem er mjög erfitt að brúa seinna, fá aftur þá áhorfendur sem eru vanir að koma á sýningar og venjast því að þær séu ekki til staðar.“

„Við erum ekki að biðja um neina aukningu“

Óperustjóri Íslensku óperunnar segir stofnunina ekki vera að biðja um meira en hún hefur áður fengið. Upphæð sem menningar- og viðskiptaráðuneyti nefndi í gær sé misvísandi og dugi ekki til að halda rekstrinum gangandi.

Upp­hæð ráðu­neytisins dugi ekki

Íslenska óperan segir að sú upphæð sem menningar- og viðskiptaráðuneytið segir að komi til stofnunarinnar fyrir rekstur í ár og á næsta ári muni ekkki duga til að halda stofnuninni starfandi. Íslenska óperan muni óhjákvæmilega leggjast af löngu áður en eitthvað annað geti tekið við.

Ekki verði skrúfað fyrir fjár­fram­lög fyrr en fram­tíðin er mótuð

Menningar- og viðskiptaráðuneytið segir að fjárframlögum til Íslensku óperunnar verði ekki hætt áður en búið verður að móta framtíð óperustarfsemi á landinu. Íslenska óperan birti í dag áskorun til ríkisstjórnarinnar þar sem kom fram að stofnunin neyðist til að hætta starfsemi vegna niðurskurðar.

Ís­­lenska óperan muni neyðast til að hætta starf­­semi

Rekstrarframlögum til Íslensku óperunnar verður hætt að því fram kemur í áskorun frá stjórn stofnunarinnar. Að því er fram kemur í áskoruninni er niðurskurðurinn svo mikill að stofnunin sér ekki annað í stöðunni en að hætta starfsemi.

Mest lesið


Fleiri fréttir

Sjá meira


×

Mest lesið