Milljarða tjón hjá Karolinska Institutet þegar frystir bilaði um jólin

Atvikið átti sér stað um í desember en á tímabilinu 22. til 23. desember virðist frystirinn hafa bilað og varaði bilunin í fimm daga.

Sýnin voru geymd í hylkjum með fljótandi köfnunarefni í 190 gráðu frosti en fyllt er sjálfvirkt á hylkin reglulega. Þetta kerfi bilaði hjá stofnuninni og því fór sem fór og sýni frá fjölda rannsóknastofa eyðilögðust. Hylkin eiga að þola fjögurra daga hlé á endurfyllingu en í þetta sinn liðu fimm dagar, segir í umfjöllun Guardian um málið.

Tjónið er óljóst en sumir sænskir miðlar hafa talað um að sýnin sem eyðilögðust séu verðmetin á um 6,5 milljarða íslenskra króna. Að auki hefur áratuga rannsóknastarf farið forgörðum. Enn er óljóst hvað olli biluninni og hefur lögregla verið kölluð til til að rannsaka málið.