Betra ef Bjarni hefði rætt hug­­­myndir sínar við nefndina

Fulltrúar utanríkisþjónustunnar og flóttamannaaðstoðarinnar funduðu í dag um frystingu á fjárframlögum Íslands vegna ásakana um tengsl tólf starfsmanna stofnunarinnar við Hamas-samtökin og hryðjuverkin 7. október.

Bjarni Benediktsson utanríkisráðherra gat ekki veitt viðtal um málið í dag en hann segir ekkert því til fyrirstöðu að halda stuðningnum áfram fáist fullnægjandi skýringar og viðbrögðin teljist ásættanleg. Nokkur ríki hafa fryst framlög til flóttamannaðstoðar, þeirra á meðal Bandaríkin, Þýskaland og Japan sem veita einna hæstu framlögin.

Sameinuðu þjóðirnar lýstu í dag yfir miklum áhyggjum vegna þessa í ljósi brýnnar þarfar á Gasa. Þingmenn úr röðum stjórnarflokka og stjórnarandstöðu hafa gagnrýnt utanríkisráðherra, ýmist fyrir þessa ákvörðun eða samráðsleysi. Til stendur að fjalla um málið á næsta fundi utanríkismálanefndar Alþingis.

Mikilvægt að halda aðstoðinni áfram

Þingflokksformaður Vinstri grænna segir aðstoðina vera lykilstofnun í viðbragði og aðstoð inni á Gasa, og raunar allri Palestínu.

„Og okkur í Vinstri grænum hefði nú þótt fara betur á því ef ráðherrann hefði rætt þessa hugmynd sína, áður en hann tók ákvörðun um það, sér í lagi við utanríkismálanefnd Alþingis,“ segir Orri Páll Jóhannsson þingflokksformaður.

Hann gefi sér að einhver rök búi að baki ákvörðun Bjarna, sem hann hljóti á einhverjum tímapunkti að deila með utanríkismálanefnd. Nefndin hafi lagt fram ályktun á þinginu, sem fékkst samþykkt, sem lúti að því að styðja við mannúðaraðstoð á Gasa og Alþjóðadómstólinn. 

„Það er gríðarlega mikilvægt að við höldum þeirri aðstoð áfram, hefði ég haldið, og því erum við sammála í VG.“

Betra að bíða og sjá

Orri svarar því játandi að það varpi skugga á stofnunina ef í ljós kemur að starfsmenn hennar hafi tekið þátt í, stutt eða fagnað hryðjuverkum Hamas á Ísrael 7. október síðastliðinn, þar sem yfir þúsund manns létu lífið. 

„En nú er rannsókn í gangi á þessum ásökunum eða ávirðingum sem þarna eru í gangi. Norðmenn frændur okkar virðast hafa tekið ákvörðun um það að halda stuðningnum áfram, þangað til rannsókninni lyki. Ég hefði haldið að það færi allavega betur á því að við hefðum gert slíkt hið sama, vegna þess að þetta er lykilstofnun í aðstoð inni á svæðinu og ástandið er hryllilegt eins og við vitum öll.“

Málið verður til umræðu á næsta fundi utanríkismálanefndar þingsins á miðvikudag. Um helgina kallaði Þorgerður Katrín Gunnarsdóttir, formaður Viðreisnar og nefndarmaður í nefndinni, eftir því að nefndin yrði upplýst um grundvöll ákvörðunar utanríkisráðherra. 

Sjá einnig: Nefndin verði upplýst um grundvöll ákvörðunarinnar

Gera mætti ráð fyrir því að farið yrði vel yfir málið. Sagðist hún telja mestu máli skipta að samráð yrði haft við önnur Norðurlönd vegna málsins. En Finnland og Ísland