Ekkert lið nýtt færin jafn illa og Chelsea

Lærisveinar Mauricio Pochettino í Chelsea hafa verið með eindæmum óheppnir fyrir framan mark andstæðinganna en ekkert lið í deildinni hefur brennt af jafn mörgum dauðafærum í vetur. Markatala liðsins er 29-28, eitt mark í plús.

Liðið situr sem stendur í 11. sæti og hefur aðeins náð í tvo sigra í síðustu sjö deildarleikjum. Til að bæta gráu ofan á svart hafa meiðsli lykilmanna sett strik í reikning liðsins en alls eru ellefu leikmenn á sjúkralista fyrir leikinn í kvöld.

Gengi Crystal Palace hefur svo sem ekki verið neitt til að hrópa húrra fyrir heldur en liðið er í 15. sæti, fjórum stigum á eftir Chelsea. Í síðustu 13 leikjum liðsins hefur liðið sótt ellefu stig af 39 mögulegum.

Bæði lið eru eflaust staðráðin í að nýta leikinn í kvöld til að rétta úr kútnum en leikurinn hefst kl. 19:30 og verður í beinni textalýsingu hér á Vísi.