Náðu ekki samningum um á­fram­haldandi leikskólastarf í Grinda­vík

Annars vegar er um að ræða tímabundna vistun barna vegna óvissuástandsins í Grindavík, sem bærinn mun taka við, og hins vegar samning um skólastarf Króks sem fellur úr gildi um áramót á næsta ári. 

Þetta kemur fram í tölvupóstum frá Grindavíkurbæ og Skólum ehf. til foreldra barnanna sem fréttastofa hefur undir höndum.

„Starfsemi safnleikskóla fyrir grindvísk leikskólabörn verður óskert eftir áramót að öllu óbreyttu,“ segir í tölvupósti frá bænum. Þar er einnig tekið fram að bæjarráð hafi falið Skólaþjónustu Grindavíkurbæjar að skipuleggja leikskólavistun allra grindvískra leikskólabarna frá og með næstu áramótum.

Í póstinum er vísað í bókun bæjarráðs, þar sem að segir að „með hagsmuni leikskólabarna í Grindavík að leiðarljósi“ muni bærinn sjá um vistun barnanna.

Líkt og áður segir tilkynntu Skólar ehf. einnig um ákvörðunina í pósti til foreldra. Þar er þakkað fyrir gott og farsælt samstarf, en fólk beðið um að ræða við Grindavíkurbæ varðandi áframhaldandi leikskólastarf.

Skólar ehf. rekur fimm heilsuleikskóla að Króki meðtöldum. Fyrirtækið er í eigu Guðmundar Péturssonar sem jafnframt er stjórnarformaður.