Ætla kveðja Helenu á leik Hauka og Vals á morgun og það er frítt inn

„Við ætlum að nýta tækifærið, fyrst að Valur kemur til okkar, og kveðja formlega Helenu Sverrisdóttur en þessi tvö lið eru þau einu sem hún hefur spilað með á Íslandi. Helena ákvað eftir síðasta landsleikjaglugga að leggja skóna á hilluna en þrálát meiðsli hafa haldið henni meira og minna utan vallar síðustu ár,“ segir á miðlum Hauka.

Leikurinn fer fram í Ólafssal og hefst klukkan 18.00. Hann verður sýndur beint á Stöð 2 Sport 5.

Frítt verður á leikinn í boði B&L en haukar segjast vonast eftir því að stuðningsmenn beggja liða sem og þeir fjölmörgu leikmenn, þjálfarar, sjálfboðaliðar og aðrir sem unnið hafa með Helenu í gegn um árin, fjölmenni á völlinn og klappi vel og rækilega fyrir þessari einstöku íþróttakonu sem Helena er.

Helena er uppalin í Haukum og hjálpaði félaginu að verða Íslandsmeistari í fyrsta sinn 2006 og svo aftur 2007.

Eftir að Helena kom heim úr atvinnumennsku árið 2019 þá fór hún í Val og hjálpaði líka Valskonum að verða Íslandsmeistari í fyrsta sinn 2019 og svo aftur 2021.

Helena varð alls fimm sinnum Íslandsmeistari og fimm sinnum bikarmeistari.

Hún vann tvöfalt á þremur tímabilum 2006-07 með Haukum, 2019 með Val og svo 2021 með Val og Haukum.

Hún var sex sinnum kosinn besti leikmaður deildarinnar, fimm sinnum með Haukum og einu sinni með Val. Hún var fjórum sinnum valin besti leikmaður lokaúrslitanna, tvisvar með Haukum og tvisvar með Val.

Helena er sá leikmaður sem hefur skorað flest stig, tekið flest fráköst, gefið flestar stoðsendingar og stolið flestum boltum fyrir Hauka í efstu deild.

Hjá Val er hún í 7. sæti í stigum, 6. sæti í stoðsendingum, 9. sæti í fráköstum og 10. sæti í stolnum boltum.