Þakk­látur og stoltur af sam­fé­laginu

Sr. Elínborg Gísladóttir leiddi stundina, Kristján Hrannar organisti sá tónlistina og meðlimir úr Kór Grindavíkurkirkju leiða almennan söng. Biskup Íslands, Agnes M Sigurðardóttir, forseti Íslands, hr. Guðni Th. Jóhannesson og. Fannar Jónasson flytja ávörp.

Þakklátur og stoltur af samfélaginu

Í ávarpi sínu sagðist Guðni vita að hann talaði fyrir alla þjóðina þegar hann sagðist hugsa hlýtt til allra þeirra sem hefðu þurft að flýja heimili sín og vinnustaði í Grindavík. Þá sagðist hann þakklátur þeim sem hefðu boðið Grindvíkingum húsaskjól og annars konar aðstoð.

„Ég leyfi mér að segja að ég er þakklátur og stoltur fyrir að búa í samfélagi sem bregst svo vel við óvæntri ógn,“ sagði Guðni. Hann þakkaði einnig þeim sem væru að starfa á vettvangi og aðstoða fólk

„Svo búum við að því að eiga einvala lið vísindamanna, rýnandi í öll þau teikn sem birtast hverju sinni.“

Guðni sagði að ekki væri enn vitað hvort gjósa myndi við eða í Grindavík en ef svo færi myndu Íslendingar takast á við þann vanda með einingarmátt að vopni, þekkingu og reynslu.

„Í Grindavík munu börn áfram ganga í leikskóla og í skóla og við munum sinna þeim eldri og sjúku. Á vettvangi íþróttanna munu heimamenn áfram skora og skora,“ sagði Guðni. Hann sagði að lífið héldi áfram í Grindavík og bærinn yrði áfram sælureitur íbúa.

Óvissan verst

Fannar Jónsson, bæjarstjóri, sagði það ekki hafa farið framhjá nokkrum manni hvað Grindvíkingar hefðu gengið í gegnum að undanförnu. Mikið væri lagt á fólk að búa við þessar aðstæður.

„Við höfum í nokkur ár verið með nágranna í bakgarðinum, sem að jafnaði eru ekki auðfúsir gestir. Eldgos og jarðskjálftar sem þeim fylgja,“ sagði Fannar. Hann sagði Grindvíkinga hafa þó blessunarlega verið laus við að standa frammi fyrir því sem þeir gera nú.

„Það eru ekki nema um það bil tveir dagar síðan við voru síðan við vorum aðallega að fást við það vandamál að það færi heitt vatn af öllu Reykjanesinu. Þrjátíu þúsund manna byggð og þar með talinn flugvöllurinn, sem er auðvitað lífæð okkar við önnur lönd,“ sagði Fannar.

Hann sagði allt svæðið vel vaktað og sagðist bera mikið traust til íslenskra vísindamanna.

„Þegar í ljós kemur á föstudaginn að málið sé alvarlegra en svo að við þurfum að hafa mestar áhyggjur af Svartsengi, það sé sprunga undir fótunum á okkur og nái allt til sjávar, eins og myndir sem fjölmiðlar hafa birt bera með sér. Þá tók við miklu meiri alvara í þessum málum öllum. Alvara lífsins.“

Fannar sagði óvissuna fara verst með fólk.

„Við vitum ekki hvert framhaldið verður. Við vonumst til þess að það muni ekki gjósa. Við höfum verið lánsöm með þessi gos og staðsetningu þeirra hingað til, sem ekki hafa truflað okkar en nú er allt önnur staða uppi.“

Athöfnina í dag má sjá í spilaranum hér að neðan.

Ljósmyndarinn Viktor Freyr Arnarson tók meðfylgjandi myndir í Hallgrímskirkju í dag.