Það sem gerðist í nótt

Skjálftavirknin jókst verulega seinni partinn í gær. Í kjölfarið ákváðu margir Grindvíkingar að yfirgefa bæinn enda skjálftavirknin nærri stöðug og skjálftarnir stórir. Skýr merki voru á þeim tíma um að kvikugangurinn væri nærri Sundhnúkagígum, í um kílómetra fjarlægt frá nyrstu byggð bæjarins og um 1,5 kílómetrum frá virkjuninni í Svartsengi. Þetta átti svo eftir að breytast í nótt.

Klukkan 23

Í kjölfar skjálftana var greint frá nokkru eignatjóni og sprungum í vegum. Þá hafði Grindavíkurvegur farið í sundur og var lokað. Klukkan 23 var svo greint frá því að kvikugangurinn gæti verið undir Grindavík. Þá var ákveðið að rýma bæinn og sett á neyðarstig almannavarna. Boðað var til upplýsingafundar þar sem farið var yfir helstu staðreyndir.

Í kjölfarið gengu björgunarsveitir, lögregla og aðrir viðbragðsaðilar hús úr húsi í Grindavík til að tryggja að fólk færi. Gert var ráð fyrir að tæming bæjarins ætti að vera lokið seinasta lagi um þrjú í nótt. Íbúar voru hvattir til að setja miða í glugga svo viðbragðsaðilar vissu að þau væru farin.

Fólk sem ekki gat leitað við ættingja, vina eða vandamanna fór í fjöldahjálparstöðvar sem eru staðsettar Vallaskóla á Selfossi, Íþróttahúsinu við Sunnubraut í Reykjanesbæ og í Kórnum í Kópavogi. Þær eru opnar og öllum velkomið að leita þangað og dvelja eins lengi og þörf er á. Tugir leituðu í fjöldahjálparstöðvarnar samkvæmt upplýsingum frá viðbragðsaðilum. Þá fóru umsækjendur um alþjóðlega vernd, sem dvöldu í Grindavík, í fjöldahjálparstöð í Borgartúni.

Klukkan þrjú

Stöðufundur fór fram hjá Veðurstofu og viðbragðsaðilum klukkan þrjú. Eftir fundinn var greint frá því að bæði GPS gögn og gervitunglamyndir staðfesta að síðan í gærkvöldi hefur myndarlegur kvikugangur myndast og er hann töluvert stærri en talið var í fyrstu. Kvikugangurinn virtist þá vera að teygja sig suðvestur, frá Sundhnjúkagígum í gegnum Grindavík og svo áfram suðvestur eða nærri þrjá kílómetra í þá átt.

Þá kom fram að möguleiki væri á að opnast gæti stór sprunga á svæðinu og að eldgos geti orðið á næstunni, en ekki hægt að fullyrða um það.

Eldgosin sem landsmenn hafa kynnst á svæðinu undanfarin ár hafa stundum verið nefnt túristagos. Staðsetning þeirra hefur þótt afar heppileg og fólk lagt leið sína til að bera gosið augum úr töluverðu návígi. Fari svo að sprunga opnist í sjó og gjósi yrði birtingarmyndin allt önnur. Þá yrði um sprengigos að ræða en ekki hraungos eins og við Fagradalsfjall.

Varðskipið Þór kom svo til Grindavíkur í nótt. Í kjölfar fundar viðbragðsaðila klukkan þrjú var ákveðið að kalla þá viðbragðsaðila sem voru í bænum úr bænum og að færa varðskipið fjær bænum. Það var gert vegna þess að lágmarka alla hættu. Um klukkan fimm var því bærinn orðinn alveg tómur utan löggæslu.

Svona hljóðaði tilkynning frá almannavörnum klukkan 04:24

Rýming Grindavíkurbæjar lauk um klukkan eitt í nótt án vandkvæða. Stærsti hluti viðbragðsaðila eru komnir í hvíld.

Eftir stöðufund Veðurstofu Íslands og Almannavarna sem lauk um klukkan 3:30 í nótt var tekin sú ákvörðun að auka varúðarráðstafanir enn frekar og ákveðið hefur verið að kalla viðbragðsaðila frá svæðinu. Lögregla mannar lokunarpósta og verður áfram með öryggisgæslu á svæðinu.

Klukkan sex

Eftir stöðufund almannavarna klukkan sex greindi Hjördís Guðmundsdóttir, upplýsingafulltrúi almannavarna, frá því að staðan væri sú sama. Enn er stór hluti viðbragðsaðila í hvíld en einhverjir komnir á Reykjanes.

Næsti stöðufundur verður klukkan átta. Þá verður búið að fjölga nokkuð í samhæfingarmiðstöðinni þótt allar nauðsynlegar stöðvar séu mannaðar.

„Við sendum marga í hvíld til að safna þreki fyrir dagana sem eru framundan.“

Hún nefnir sérstaklega að gott sé að allir hafi komist heilu og höldnu frá bænum þótt rétt sé hægt að ímynda sé líðan fólks sem þurfti að yfirgefa heimili sitt í gærkvöldi og í nótt vegna hættunnar.

Löggæsla er áfram á svæðinu og lokunarpóstar mannaðir.

Fylgst er með gangi mála í vaktinni hér að neðan. Þá má sjá yfir hluta skjálftasvæðisins í vefmyndavél Vísis á Þorbirni.