Hefur ekki tíma til að vera stressaður

Blikar leika við Gent frá Belgíu á Laugardalsvelli í riðlakeppni Sambandsdeildarinnar og það 9. nóvember. Það muna eflaust margir eftir pulsunni sem sett var upp fyrir umspilsleik gegn Króötum seint árið 2013. Nú er samskonar búnaður kominn yfir völlinn. Síðustu vikur hefur verið legið dúkur yfir grasinu en nú er kominn nýr.

„Þetta er annar dúkur sem kom til landsins í síðustu viku. Við notuðum okkar dúk þangað til að þessi kom,“ segir Kristinn V. Jóhannsson vallarstjóri vallarins í kvöldfréttum Stöðvar 2 í gærkvöldi.

„Staðan á grasinu er að verða betri og betri og er að verða fínt í dag. Við höfum verið hérna allan sólarhringinn síðustu daga að setja þetta upp. Hitastigið undir honum eru 12 til fjórtán gráður og jarðvegshitinn er að hækka og þetta lítur nokkuð vel út.“

Kristinn segir að hann sé aldrei fullkomlega sáttur við veðrið hér á landi á þessum árstíma.

„Ég held að ísbúðareigendur og vallarstarfsmenn séu ekkert gríðarlega sáttir með veðrið þessa dagana. En þetta hefði getað verið verra. Pulsan ræður við ákveðið mikið af vind og ákveðið mikla ofankomu og við höfum hvorki fengið mikið rok né mikla snjókomu. Meðan pulsan fer ekki að falla niður og við missum varma út þá erum við ánægðir.“

Kristinn segir að án starfsfólks vallarins væri þetta ekki hægt, allir sem vinni við vallarmál á Laugardalsvelli séu að hans mati ótrúlegt starfsfólk. Leikið verður á vellinum aftur 30. nóvember.

„Ég hef ekki haft tíma til að vera stressaður fyrir þeim leik. Þessi helgi hefur verið svo mikil áskorun. Það gistu nokkrir starfsmenn hérna í nótt og vöktuðu svæðið. Síðustu tvær, þrjár vikur hafa bara verið einn dagur í einu.“