Umfjöllun: Ísland - Danmörk 0-1 | Sárt tap sem skýrir stöðuna

Ísland varð að sætta sig við nístingssárt tap gegn Danmörku í þriðja leik sínum í A-deild Þjóðadeildarinnar í fótbolta kvenna, á Laugardalsvelli í kvöld. Íslendingar eru með þrjú stig í riðli 3 en Danir með fullt hús stiga eða níu.

Amalie Vangsgaard skoraði eina mark leiksins í kvöld á 71. mínútu en frammistaða Íslands hefði vel getað dugað fyrir stigi. Meðal annars átti Glódís Perla Viggósdóttir skalla í þverslá eftir hornspyrnu í fyrri hálfleik.

Þar með virðist útséð með að Ísland keppi við Dani og Þjóðverja um efsta sæti riðilsins, og sennilegt að baráttan verði við Wales um að forðast fjórða og neðsta sæti riðilsins. Wales tapaði 5-1 fyrir Þýskalandi í kvöld en Þjóðverjar koma í heimsókn í Laugardalinn á þriðjudag.

Það var engu að síður allt, allt annað að sjá til íslenska liðsins í kvöld en í 4-0 skellinum gegn Þýskalandi ytra í síðasta mánuði. Danska liðið saknaði vissulega reynslumikilla leikmanna, og þar á meðal markahróksins mikla Pernille Harder, en það gerir íslenska liðið svo sannarlega líka eftir mikið brotthvarf síðustu misseri. Frammistaðan í kvöld, þrátt fyrir tap, gefur vonir um að þrátt fyrir það geti Ísland áfram haldið sig í námunda við bestu lið álfunnar.

Leikmenn og þjálfarar Íslands hafa ítrekað talað um að liðið þurfi að sýna meira hugrekki, halda í boltann og þora að sækja gegn sterkum mótherja. Það gerði liðið í kvöld, sem vissulega skapaði reyndar í örfá skipti mikla hættu við mark Íslands, en það skilaði sér í ljómandi góðum tækifærum fram á við.

Duglegir sóknarmenn Íslands gáfu Dönum frá byrjun engan frið með boltann, og það var alls ekki svo að gestirnir fengju að stjórna leiknum. Eftir tuttugu mínútna leik kom svo skalli Glódísar í þverslá þar sem engu mátti muna að hún skoraði nánast eins mark og í 1-0 sigrinum gegn Wales í síðasta mánuði.

Selma Sól Magnúsdóttir átti hornspyrnuna á Glódísi en annars kom það í hlut hinnar 19 ára gömlu Sædísar Rúnar Heiðarsdóttur, í sínum fyrsta A-landsleik, að taka flestar hornspyrnur Íslands með sinn öfluga vinstri fót. Sædís gerði alveg sín mistök í leiknum en er greinilega fullfær um að koma inn í A-landsliðið og eigna sér stöðu vinstri bakvarðar næstu árin og það eru afar góðar fréttir.

Sædís átti einnig langt innkast í upphafi seinni hálfleiks sem litlu munaði að endaði með marki frá Öglu Maríu Albertsdóttur. Sandra María Jessen náði svo að komast inn í sendingu markvarðar Dana, Lene Christensen, en þó aðeins með tánni og ekki þannig að hún næði að stýra boltanum á markið.

Fyrir utan eitt dauðafæri Dana í upphafi seinni hálfleiks, eftir skelfilega sendingu Selmu, sem Telma sá við þá var hins vegar fátt sem benti til þess að gestirnir næðu forystunni. Það gerðu þeir hins vegar með laglegu marki Vangsgaard tuttugu mínútum fyrir leikslok, eftir fasta fyrirgjöf Sofie Svava af vinstri kantinum.

Ísland svaraði markinu af krafti og Hlín Eiríksdóttir var hársbreidd frá því að jafna metin af miklu harðfylgi skömmu síðar. Hún fékk fleiri tækifæri á lokamínútum leiksins en inn vildi boltinn ekki og Danir náðu að kreista fram sigur.

Ef Ísland nær sigri gegn Þýskalandi á þriðjudag er vissulega enn von um að liðið endi ofar en í 3. sæti, en Ísland er samt sex stigum á eftir Danmörku og þremur á eftir Þýskalandi sem auk þess yrði væntanlega alltaf með betri innbyrðis úrslit gegn Íslandi eftir 4-0 sigurinn.

Það er hins vegar afar mikilvægt að Ísland haldi Wales fyrir neðan sig og forðist þannig beint fall niður í B-deild, fyrir undankeppni EM sem hefst næsta vor. Ef bæði lið tapa öllum leikjunum við Þýskaland og Danmörku er óvíst að 1-0 heimasigurinn gegn Wales dugi en Ísland spilar í Wales 1. desember og lýkur svo keppni í Danmörku fjórum dögum síðar.