Var þetta fyrsti leikurinn á nýuppgerðum heimavelli Luton, Kenilworth Road, en það voru þó gestirnir sem áttu fyrsta höggið þegar Jarrod Bowen skallaði frábæra fyrirgjöf Lucas Paqueta í netið á 37. mínútu og sá til þess að West Ham fór með forystu inn í hálfleikinn.
Emerson hélt svo að hann hefði tvöfaldað forystu West Ham snemma í síðari hálfleik, en markið að lokum dæmt af vegna rangstöðu eftir skoðun myndbandsdómara.
Annað mark West Ham kom þó að lokum þegar Kurt Zouma skallaði hornspyrnu James Ward-Prowse í netið á 85. mínútu og þar með virtist öll von Luton vera úti.
Mads Juel Andersen kveikti þó vonarneista fyrir heimamenn þegar hann skallaði boltann í netið á annarri mínútu uppbótartíma, en nær komust þeir þó ekki og niðurstaðan varð 1-2 sigur West Ham.
Með sigrinum lyftir West Ham sér í það minnsta tímabundið á topp ensku úrvalsdeildarinnar, en liðið er nú með tíu stig eftir fjóra leiki, einu stigi meira en Englandsmeistarar Manchester City sem eiga leik til góða. Luton er hins vegar enn á botninum án stiga.
