Óskar og Helgi Björns bera sig vel

Eiður Þór Árnason skrifar 18. ágúst 2023 18:00

GDRN, Helgi Björns og Óskar Magnússon eiga það sameiginlegt að hafa sínar tekjur af listsköpun. Vísir

Óskar Magnússon, rithöfundur og bóndi var tekjuhæsti listamaður landsins á síðasta ári með 5,5 milljónir króna að jafnaði á mánuði, samkvæmt álagningarskrá Skattsins. Þá heldur Helgi Björnsson tónlistarmaður áfram að gera það gott og var að jafnaði með fjórar milljónir króna á mánuði, miðað við greitt útsvar.

Greint er frá þessu í nýju Tekjublaði Frjálsrar verslunar sem kom út í dag og má nálgast hér. Um er að ræða útsvarsskyldar tekjur árið 2022. Hafa ber í huga að þær tekjur endurspegla þó ekki endilega öll laun viðkomandi.

Óskar hefur komið víða við á ferlinum, var einn af aðaleigendum Morgunblaðsins og var útgefandi þess til loka ársins 2014. Hann hefur einnig verið forstjóri TM og Hagkaups og var áður stjórnarformaður Baugs hf. Hann gaf í fyrra út skáldsöguna Leyniviðauki 4.

Sigga Beinteins með 2,2 milljónir

Helgi heldur áfram að vera einn vinsælasti tónlistarmaður landsins og hefur meðal annars vakið athygli fyrir vinsæla tónleika og streymisviðburði. Næst á lista yfir tekjuhæstu listamennina á síðasta ári koma Atli Geir Grétarsson leikmyndahönnuður með 2,3 milljónir króna á mánuði og Sigga Beinteins tónlistarkona með 2,2 milljónir, miðað við greitt útsvar.

Meðal annarra markverðra listamanna í Tekjublaði Frjálsrar verslunar má nefna Árna Pál Árnason, betur þekktur sem Herra hnetusmjör, sem er skráður með 794 þúsund krónur á mánuði, Þórhall Sigurðsson, Ladda með 1,1 milljón króna og Yrsu Sigurðardóttur með 712 þúsund. Þá er Guðrún Ýr Eyfjörð Jóhannesdóttir, GDRN skráð með 376 þúsund krónur á mánuði að jafnaði.

Tekjuhæstu listamennirnir í Tekjublaðinu

Óskar Magnússon, rithöfundur og bóndi – 5,5 milljónir króna
Helgi Björnsson 4,0 milljónir króna
Atli Geir Grétarsson, leikmyndahönnuður – 2,3 milljónir króna
Sigríður M. Beinteinsdóttir, tónlistarkona – 2,2 milljónir króna
Steinunn Birna Ragnarsdóttir, óperustjóri – 1,9 milljónir króna
Margrét Einarsdóttir, búningahönnuður – 1,9 milljónir króna
Þorsteinn Guðmundsson, leikari – 1,7 milljónir króna
Ragnar Jónasson, rithöfundur og lögfr. – 1,7 milljónir króna
Örn Árnason, leikari – 1,5 milljónir króna
Baltasar Kormákur Baltasarsson - 1,5 milljónir króna
Steinþór Hróar Steinþórsson, skemmtikraftur – 1,5 milljónir króna

Ýmsir aðrir listamenn

Saga Garðarsdóttir – 397.000 krónur
Ragnar Jónsson – 541.000
Salka Sól Eyfeld Hjálmarsdóttir – 639.000 krónur
Árni Páll Árnason, Herra Hnetusmjör – 794.000 krónur
Vilborg Yrsa Sigurðardóttir – 712.000
Nína Dögg Filipusdóttir – 672.000 krónur
Jóhannes Haukur Jóhannesson – 229.000 krónur
Brynhildur Guðjónsdóttir – 1,5 milljónir króna
Þórhallur Sigurðsson, Laddi – 1,1 milljón króna
Guðrún Ýr Eyfjörð Jóhannesdóttir, GDRN – 376.000 krónur

Tekjublað Frjálsrar verslunar kom út í dag en rétt er að árétta að um er að ræða útsvarsskyldar tekjur á árinu 2022 og þurfa þær ekki að endurspegla föst laun viðkomandi. Munurinn getur falist í launum fyrir setu í nefndum og önnur aukastörf og hlunnindi vegna kaupréttarsamninga. Í launum sumra kann að vera falinn bónus vegna ársins 2021 sem var greiddur árið 2022.

Miðað er við útsvarsstofn samkvæmt álagningarskrá en í tölunum eru ekki fjármagnstekjur, til dæmis af vöxtum, arði eða sölu hlutabréfa. Sleppt er skattfrjálsum dagpeningum, bílastyrkjum og greiðslum í lífeyrissjóði. Þá ber að hafa í huga að inn í tekjunum geta líka verið einskiptisgreiðslur vegna úttektar á séreignasparnaði hjá lífeyrissjóði.

Verktakagreiðslur flokkast ekki sem útsvarsskyldar tekjur og eru því ekki teknar fyrir í álagningaskrá Ríkisskattstjóra sem Tekjublaðið styðst við.

Tekjur