Vestfirðir verði áfram jaðarsettir í nýrri samgönguáætlun

Þetta kemur fram í umsögn fyrirtækisins um samgönguáætlun sem birt var í samráðsgátt stjórnvalda. Undir umsögnina ritar forstjórinn Guðmundur Fertram Sigurjónsson. 

Sigurður Ingi Jóhannsson innviðaráðherra kynnti samgönguáætlun til næstu fimmtán ára í júní. Þar er gert ráð fyrir að 909 milljarðar króna verði varið í samgöngur á tímabilinu. Auknu fjármagni verði varið í innanlandsflugvelli og einbreiðum brúm á hringveginum útrýmt.

Skatttekjur Kerecis dugi til að koma vegasamgöngum í lag

Í umsögn Kerecis segir að vegakerfi Vestfjarða sé það lang lakasta á landinu og svo verði staðan ennþá árið 2038.

„Vestfirðir þurfa að njóta forgangs þegar fjármunum til samgöngumála er úthlutað þannig að hægt sé að vinna upp þá samgönguskuld sem byggst hefur upp á svæðinu frá upphafi vegagerðar á Íslandi,“ segir í umsögninni.“ 

Þá er fjallað um skatttekjur sem muni hljótast af sölu Kerecis til danska fyrirtækisins Koloplast, sem og tekjur af laxeldi og öðrum atvinnugreinum muni nema 150 milljörðum króna „innan nokkurra ára“. Þessar tvær atvinnugreinar hafi auk þess snúið við neikvæðri íbúaþróun á síðust árum. 

„Útflutningsverðmæti af fiskafurðum snarhækkar, áhrifin á gengi krónunnar eru jákvæð og skattsporið af starfseminni er stórt. Þannig má færa rök fyrir því, að skattgreiðslur í kjölfar nýlegrar sölu Kerecis dugi einar og sér til að koma vegasamgöngum milli Ísafjarðar og Reykjavíkur í viðunandi horf.“

Vestfjarðarlína

Lagt er til nútíma gatnakerfi sem er sagt „leiðrétta samgönguskuld“ sem hafi orðið til við Vestfirði undanfarna áratugi. 

„Hún er grunnur þess að efnahagsævintýrið sem er í uppsiglingu á Vestfjörðum haldi áfram og byggir á borgararéttindum Vestfirðinga, þörfum atvinnulífs og mannlífs á Vestfjörðum. Vestfjarðarlínan samanstendur af nútíma gatnakerfi með þremur meginjarðgöngum (Brattabrekka, Klettsháls, Dynjandisheiði) og þremur bæjarfélagajarðgöngum sem tengja Patreksfjörð, Tálknafjörð, Bíldudal og Súðavík með láglendisveg við Vestjarðalínuna. Drögin að samgönguáætlun ganga miklu skemur að umfangi en Vestfjarðarlínan sem er óásættanlegt.“

Efnahagsævintýri sem verður að halda áfram

Þá segir að samgöngur til Ísafjarðar eigi að vera sambærilegar þeim til Akureyrar. 

„Höfuðstaðir landshlutanna gegna mikilvægu hlutverki og brýnt að opinberir aðilar gæti jafnræðis við úthlutun fjár sem á að auka lífsgæði íbúa. Samgöngusamanburður við Akureyri er afar óhagstæður fyrir Ísafjörð, bæði varðandi vega- og flugsamgöngur.“

Að lokum segir:

„Til að þetta efnahagsævintýri geti haldið áfram og vægi Vestjarða náð aftur sínum fyrri styrk, og borgaraleg réttindi Vestfirðinga varðandi samgöngur til jafns við aðra nái fram, er lífsnauðsynlegt að forgangsraða fjármunum til samgönguuppbyggingar til Vestfjarða á kostnað annarra landshluta. Núverandi drög að samgönguáætlun gera það ekki og er áætlunin því ósásættanleg.“