Úkraínumenn segja Rússa hafa skotið 63 eldflaugum og sprengjudrónum að Odessa í nótt. Þeim hafi tekist að skjóta niður fjórtán eldflaugar og 23 dróna. Drónar og eldflaugar sem komust í gegn ollu töluverðu tjóni á hafnarsvæðinu í borginni, sem er stærsta útflutningshöfn Úkraínu. Sprengingarnar ollu einnig skemmdum á stóru fjölbýlishúsi í Odessa. Kona sem býr í húsinu lýsir árásinni svona:
„Ég var að horfa á sjónvarpið og gluggarnir þeyttust á rúmið við hliðina á mér. Sírenan fór allt í einu í gang og svo gerðist það. Rúðurnar lentu þarna og gluggapóstarnir þarna. Bíllinn var allur í klessu," sagði konan þar sem hún stóð í gluggakarmi.
Það er augljóst samhengi á milli þess að Rússar sögðu sig frá samkomulaginu og árásanna á Odessa. Matt Miller talsmaður bandaríska utanríkisráðuneytisins segir Rússa ljúga því að Vesturlönd hafi bannað útflutning þeirra á korni og annarri matvöru og þess vegna hafi þeir slitið samkomulaginu um útflutning Úkraínumanna.
„Það er ljóst að Rússar halda áfram að nota mat sem hernaðarvopn. Að þessu sinni bitna áhrifin ekki aðeins á Úkraínumönnum heldur einnig á heimsframboði á mat og verði. 65% þessara sendinga hafa farið til viðkvæmustu landa og þjóða heims. Heimsbyggðin á ekki að láta nýjustu lygar Moskvu blekkja sig.," segir Miller.

Sameinuðu þjóðirnar, Bandaríkin, Evrópusambandið og Bretland hafi greitt götu útflutnings Rússa á matvælum. Þeir hafi hagnast mikið á þeim útflutningi síðast liðið ár en reyni að þrýsta á Vesturlönd að aflétta öðrum refsiaðgerðum sem bíti á þá.

Volodymyr Zelensky forseti Úkraínu segir hins vegar að herða þurfi refsiaðgerðirnar. Rússar fái enn íhluti í eldflaugar frá Vesturlöndum og dróna frá Íran sem geri þeim kleift að fremja hryðjuverk í Úkraínu.
„Þeir nota íhluti frá löndum hins frjálsa heims. Allar slíkar staðreyndir styðja rök okkar fyrir því að núverandi refsiagðerðir og þrýstingur gegn Rússlandi dugar ekki. Ríki heimsins verða að takmarka viðskiptatengsl við hryðjuverkaríkið svo að enga íhluti frá hinum frjálsa heimi verði hægt að nota til hryðjuverka," segir forseti Úkraínu.