Tilgangur viðburðarins er að gefa öllum tækifæri, óháð þjóðerni, trú, kyni eða stöðu. Setjast saman við borð og deila hversdagslegum sögum og heyra sögur annarra.
„Við lærðum þessa aðferð hjá finnsku deild Amnesty International og frumreyndum hana í fyrsta sinn í fyrra,“ segir Árni Kristjánsson, ungliða- og aðgerðastjóri hjá Íslandsdeildinni. „Þetta gengur þannig fyrir sig að 6-8 einstaklingar, sem mögulega þekkjast ekki innbyrðis, setjast við borð hjá umræðustjórnanda og deila eigin sögum og lífsreynslu útfrá fyrirfram ákveðnum umræðuefnum.
Hlutverk umræðustjórnanda er að gæta að tímamörkum, aðstoða við túlkun ef þörf krefur og tekur einnig þátt í samtalinu og deilir eigin reynslu. Við borðin eru útprentaðar spurningar sem hver og einn þátttakandi svarar að því marki sem hann kýs.
Þetta eru einfaldar og léttar spurningar um hversdagslega atburði sem geta kallað fram skemmtilegar minningar og sögur. Þó að uppruni okkar og aðstæður geta verið gjörólíkar þá sást skýrt í fyrra að það kom gestum á óvart hvað þau áttu margt sameiginlegt.“
Ungliðahreyfing Amnesty International samanstendur af ungu fólki á aldrinum 15-25 ára en þessi viðburður er ætlaður öllum, bæði Íslendingum jafnt sem fólki með erlendan bakgrunn. Það er ókeypis inn á viðburðinn og heitir drykkir í boði fyrir söguboðsgesti.
89.3 milljónir einstaklinga á flótta
„Sameinuðu þjóðirnar tilnefndu 20. júní sem alþjóðadag flóttafólks til að heiðra flóttafólks um allan heim. Samkvæmt Flóttamannastofnun Sameinuðu þjóðanna eru nú um 89.3 milljónir einstaklinga á flótta og hefur þeim þá fjölgað um 7.3 milljónir frá síðasta söguboði,“ segir Íris Björk Ágústsdóttir, forseti háskólafélags Amnesty International og nemi í stjórnmálafræði við HÍ.
„Þetta eru dramatískar tölur en Söguboðið snýst hins vegar ekki um að tala um gallað regluverk eða að hlusta bara á sögur flóttafólks, heldur fyrst og fremst að deila hversdagslegum sögum og spyrja um hversdagslega hluti. Stundum er áhersla á það sammannlega besta leiðin til að minna á að mannréttindi eru fyrir okkur öll.“
Viðburðurinn verður frá kl. 17-19 og er aðgangur ókeypis. Mælt er með því að mæta snemma til að ná sæti við borðin þar sem sögunum verður deilt.
