Aukið að­gengi að á­fengi ekki fram­fara­skref

Nýverið fór Costco að selja viðskiptavinum sínum áfengi og það einnig á sunnudögum, sem hingað til hefur ekki verið heimilt. Framkvæmdastjóri Hagkaups tilkynnti svo í vikunni að verslunin vinni að því að koma áfengu í netverslun sína á næstu misserum.

Í áfengislögum segir skýrt að Áfengis- og tóbaksverslun ríkisins hafi einkaleyfi til smásölu áfengis en þrátt fyrir það hefur sala áfengis á netinu farið fram síðastliðið ár en Heimkaup reið á vaðið í netsölu áfengis í fyrra.

Ögmundur Jónasson, fyrrverandi innanríkisráðherra, segir aukið aðgengi að áfengi ekki framfaraskref

„Þetta snýst um það hvert Íslendingar vilja stefna með þessi mál. Í mínum huga er verið að stíga skref afturábak. Þetta er ekki framfaraskref sem menn eru að stíga,“ segir Ögmundur og vísar þar til skoðana Alþjóðaheilbrigðisstofnunarinnar, læknasamfélagsins og annarra sem hafa hvatt Íslendinga til að halda í það fyrirkomulag sem fyrir er. Sem snýst um að virkja ekki markaðsöflin þegar áfengi er annars vegar.

„Þess vegna er salan og dreifing í höndum ÁTVR,“ segir Ögmundur og að með því að selja áfengi á netinu sé verið að fara inn bakdyramegin.

Ögmundur bendir á að þegar Costco kom til landsins hafi það verið skilyrði að lögum um áfengisverslun yrði breytt og með þessu séu þau í raun að fá sínu framgengt.

„Mér finnst þetta mál þurfa að fá umræðu í þinginu og þjóðfélaginu áður en afdrifaríkar ákvarðanir eru teknar,“ segir Ögmundur og heldur áfra: „Fram til þessa hefur Vinstrihreyfingin grænt framboð þar sem ég var þingmaður verið þessu algerlega andvíg, og innan annarra flokka hefur verið andstaða líka. Þetta er ekki flokkspólitískt mál í þeim skilningi þó að línurnar hafi legið á mismunandi vegi. Þetta er þverpólitískt mál,“ segir Ögmundur og að það þurfi að horfa vítt í þessu máli. Til hagsmunaaðila og áfengisvandans.

„Það kemur mér á óvart að Alþingi skuli vera svo andvaralaust í þessu máli,“ segir Ögmundur og að það sé ekki í samræmi við þá lýðheilsustefnu sem var samþykkt á Alþingi.

„Ef að menn ætla að láta þetta yfir sig ganga þá eiga þeir að koma hreint fram og breyta lýðheilsustefnunni líka.

Spurður hvort að það sé ekkert jákvætt við þetta, þegar til dæmis, búist er við að met verði slegin í komu ferðamanna segir Ögmundur að hann hafi ávallt verið fylgjandi þá slóð með dreifingunni eins og hún er og að það sé tryggð góð þjónusta og gott úrval vandaðra vína og að ÁTVR hafi gert það vel. Að það sé gott aðgengi en að það sé gert án þess að virkja markaðsöflin.

„Án þess að virkja markaðsöflin. Það er það sem breytist þegar þú ert komin með þetta út á markað og inn í búðirnar. Til aðila sem hafa fyrst og fremst gróðann að leiðarljósi. Þá verður breyting.“