Stjórnendur PSG æfir en Mbappé segir þá ekki eiga að vera hissa

Mbappé á aðeins eitt ár eftir af samningi sínum við frönsku meistarana en var með möguleika á að framlengja samninginn um eitt ár. Þann möguleika ákvað hann að nýta ekki, svo að PSG þarf nú að selja Mbappé til að missa hann ekki ókeypis frá sér næsta sumar.

Mbappé sendi PSG bréf síðdegis í gær til að staðfesta að hann myndi ekki framlengja samning sinn.

Fabrizio Romano, helsti sérfræðingur í félagaskiptum stærstu stjarna heims, sagði í gærkvöld að það hefði komið eigendum PSG á óvart að fá bréfið, staðan væri mjög viðkvæm og að mikil reiði væri á meðal þeirra sem stjórnuðu franska félaginu.

Í yfirlýsingu sem Mbappé og hans fólk sendi AFP í dag segir að bréfið hafi aðeins verið til að staðfesta það sem hafi verið vitað. Félagið hafi „verið upplýst þann 15. júlí 2022“ um að hann myndi ekki framlengja samninginn.

Í yfirlýsingunni segir að engar viðræður um framlengingu á samningi hafi farið fram síðasta árið. Mbappé hafi hins vegar ekki farið fram á að losna frá PSG í sumar heldur aðeins viljað staðfesta að hann yrði ekki lengur en til sumarsins 2024 hjá félaginu.

Mbappé hefur spilað með PSG frá árinu 2018, sama ári og hann varð heimsmeistari með franska landsliðinu. Þessi 24 ára sóknarmaður hefur ítrekað verið orðaður við Real Madrid síðustu misseri og ljóst er að spænska félagið er í leit að sóknarmanni eftir brotthvarf Karims Benzema.

Mbappé sagði hins vegar á Twitter í dag að frétt Le Parisien um að hann vildi komast til Real Madrid væri hreinasta lygi. Sér liði vel hjá PSG og hann vildi klára síðasta árið hjá félaginu, en stefna félagsins er hins vegar að selja hann ef ekki tekst að gera nýjan samning.