Segir Rússa berjast fyrir fullveldi Rússlands

Hann líkti stjórnvöldum í Úkraínu við nasista, eins og hann hefur ítrekað gert áður, og staðhæfði að Rússar vildu friðsama framtíð. Það væru Vesturlönd sem dreifðu hatri og „Rússafóbíu“.

Pútín sagði Rússa vera að verja fullveldi sitt, þrátt fyrir að hann hafi skipað rússneska hernum að ráðast inn í Úkraínu.

Frá því Rússar réðust inn í Úkraínu í fyrra hafa Pútín, aðrir ráðamenn í Rússlandi og málpípur stjórnvalda reglulega haldið því fram að þeir eigi raunverulega í stríði við Vesturlönd og Rússar séu að berjast fyrir tilvist Rússlands. Vesturlönd séu að nota Úkraínu til að gera út af við Rússland.

Þessi orðræða hefur orðið algengari samhliða slæmu gengi rússneskra hermanna í Úkraínu og aukinna vopnasendinga Vesturlanda til Úkraínu. Úkraínumenn eiga sér bakhjarla á Vesturlöndum sem útvegað hafa þeim vopn, skotfæri og annarskonar hergögn, þjálfun og upplýsingar, svo eitthvað sé nefnt.

Forsetinn staðhæfði að hömlulaus metnaður, hroki og refsileysi Vesturlanda hefði leitt til stríðs. Pútín endaði ræðu sína, samkvæmt BBC, á því að ekkert væri sterkar en ást Rússa á móðurlandi þeirra.

„Til sigurs okkar, Húrra.“

Ræða Pútíns var í takt við aðrar ræður hans frá því innrás hans hófst

Skömmu áður en ræða Pútíns hófst skutu Rússar 25 stýriflauga á byggð ból í Úkraínu. Úkraínumenn segjast hafa skotið niður 23 þeirra.

Sjá einnig: Rússar skutu 25 stýriflaugum á Úkraínu í nótt

Þrátt fyrir ummæli Pútíns um innrásina í Úkraínu ber hún merki landvinningastríðs.

Tugir þúsunda almennra borgara hafa dáið vegna innrásarinnar, heilu borgirnar hafa verið jafnaðar við jörðu og milljónum hefur verið stökkt á flótta. Þá hefur innrásin valdið gífurlegum skaða á landsframleiðslu Úkraínu, iðnaði og landbúnaði, svo eitthvað sé nefnt.

Rússar hafa þar að auki flutt mikinn fjölda úkraínskra barna til Rússlands.

Sjá einnig: Gefa út handtökuskipun á hendur Pútín

Rússar hafa innlimað fjögur héruð Úkraínu ólöglega, til viðbótar við Krímskaga sem Rússar hertóku árið 2014. Þá hefur Pútín ítrekað haldið því fram að Úkraína sé ekki raunverulegt ríki og Rússar eigi rétt á því að stjórna því. Í því samhengi hefur Pútín einnig líkt sér við Pétur mikla, keisara Rússlands á árum áður.

Sjá einnig: Segir Rússa rétt að byrja í Úkraínu

Skrúðgangan í Moskvu var mun minni í sniðum en hún hefur verið áður. Þá var hætt við sambærilegar en smærri skrúðgöngur í minnst 21 borg í Rússlandi, samkvæmt frétt AP fréttaveitunnar. Einungis einn gamall skriðdreki sást í skrúðgöngunni og þá var herflugvélum ekki flogið yfir hátíðarsvæðið eins og áður.

Áhugasamir geta virt fyrir sér hátíðarhöldin í Moskvu í spilaranum hér að neðan.