Húsið rústir einar

Það var um klukkan hálf níu í gærkvöldi sem óskað var eftir aðstoð vegna brunans. „Við sáum það nú strax þegar við lögðum af stað frá slökkvistöðinni í Hafnarfirði að það var stórt svart ský yfir bænum,“ sagði Gunnlaugur Jónsson, aðstoðarvarðstjóri hjá slökkviliðinu á höfuðborgarsvæðinu, í samtali við fréttastofu í gærkvöldi. 

„Þetta gerðist mjög hratt og húsið varð alelda á nokkrum mínútum.“

Slökkvistörfum lauk klukkan þrjú í nótt. Eldsupptök liggja ekki fyrir en tæknirannsókn lögreglu fer fram í dag.

„Það er lítið sem hægt er að bjarga hér,“ sagði Gunnlaugur í gær. Það reyndist rétt því eftir gærdaginn er húsið rústir einar. 

Ljósmyndari Vísis fór á vettvang í dag og tók meðfylgjandi myndir af rústunum.