Ísland leikur í efstu deild Þjóðadeildarinnar, A-deild, í þessari fyrstu útgáfu af keppninni hjá kvennalandsliðum. Keppnin er með svipuðu sniði og Þjóðadeild karla sem hófst fyrir fimm árum, og hún hefst með leikjum 20.-26. september.
Íslandi var út frá árangri síðustu ára raðað í þriðja styrkleikaflokk af fjórum í A-deildinni fyrir dráttinn í dag, og ljóst að liðið fengi tvær af allra sterkustu þjóðum Evrópu í sinn riðil, auk sterks liðs úr fjórða styrkleikaflokki.
Þýskaland er sigursælasta landslið Evrópu með átta Evrópumeistaratitla, tvo heimsmeistaratitla og ólympíumeistaratitil, og situr í 2. sæti heimslistans, efst Evrópuþjóða. Danmörk, með Pernille Harder í broddi fylkingar, er í 15. sæti á nýjasta heimslistanum, sæti fyrir neðan Ísland sem hefur aldrei verið ofar á listanum. Wales er svo í 31. sæti heimslistans.
Möguleiki á Ólympíuleikum
Efsta lið hvers riðils í A-deildinni kemst í fjögurra liða úrslitakeppni í febrúar á næsta ári, þar sem spilaðir verða stakir undanúrslitaleikir og svo úrslitaleikur um sigur í keppninni. Einnig komast liðin tvö sem leika til úrslita á Ólympíuleikana í París, og ef Frakkar leika til úrslita mun liðið í 3. sæti komast á Ólympíuleikana.
Efstu tvö liðin í hverjum riðli halda svo sæti sínu í A-deildinni á næsta ári, þegar leikið verður um sæti á EM 2025 í Sviss. Neðsta lið hvers riðils fellur hins vegar.
Hvert liðanna sem enda í 3. sæti í A-deild fer svo í umspil við eitt lið úr 2. sæti í B-deildinni, og fer það umspil fram í febrúar á heimavelli A-deildarliðsins.
Leikdagarnir í Þjóðadeildinni í haust:
Leikdagar 1–2: 20.–26. september 2023
Leikdagar 3–4: 25.–31. október 2023
Leikdagar 5–6: 29. nóvember–5. desember 2023
Hér að neðan má sjá alla riðlana í Þjóðadeildinni 2023.
A-deild
- Riðill 1
- England
- Holland
- Belgía
- Skotland
- Riðill 2
- Frakkland
- Noregur
- Austurríki
- Portúgal
- Riðill 3
- Þýskaland
- Danmörk
- ÍSLAND
- Wales
- Riðill 4
- Svíþjóð
- Spánn
- Ítalía
- Sviss
B-deild
- Riðill 1
- Írland
- Norður-Írland
- Ungverjaland
- Albanía
- Riðill 2
- Finnland
- Rúmenía
- Slóvakía
- Króatía
- Riðill 3
- Pólland
- Serbía
- Úkraína
- Grikkland
- Riðill 4
- Tékkland
- Slóvenía
- Bosnía
- Hvíta-Rússland
C-deild
- Riðill 1:
- Malta
- Moldóva
- Lettland
- Andorra
- Riðill 2:
- Tyrkland
- Lúxemborg
- Litháen
- Georgía
- Riðill 3:
- Aserbaídsjan
- Svartfjallaland
- Kýpur
- Færeyjar
- Riðill 4:
- Ísrael
- Eistland
- Kasakstan
- Armenía
- Riðill 5:
- Norður-Makedónía
- Kósovó
- Búlgaría