Þjóð­þekktum flett upp í lyfja­gátt án til­efnis

Þetta kemur fram í Morgunblaði dagsins. Þar segir að Morgunblaðið hafi undir höndum gögn sem sýni uppflettingar stjórnmálafólks og þjóðþekkts fólks úr viðskipta- og menningarlífinu, svo dæmi séu tekin.

Gögnin sýni hverjum er flett upp, hvenær og í hvaða apóteki. Þau sýni hins vegar ekki hvaða starfsmaður framkvæmir uppflettinguna, sem verður að teljast óvenjulegt í ljósi viðkvæms eðlis persónuupplýsinga um lyfjanotkun.

Samkvæmt gildandi persónuverndarrétti hér á landi getur það eitt að fletta upp viðkvæmum persónuupplýsingum talist sem ólögmæt vinnsla slíkra gagna. Þá liggur fyrir að embætti Landlæknis, sem hef­ur um­sjón með og ber ábyrgð á lyfjagátt­inni, ber að gæta þess að aðgengi að viðkvæmum persónuupplýsingum sé eins takmarkað og kostur er á.

Hins vegar segir í frétt Morgunblaðsins að í skriflegu svari embættisins við fyrirspurn blaðsins segi að slík ábyrgð hvíli á apótekunum.

Þá segir að Persónuvernd hafi ekki svarað fyrirspurnum Morgunblaðsins varðandi málið.