Telur Óðin Þór vera meðal tíu bestu í heimi í sinni stöðu og geta náð enn lengra

Kadetten vann þriggja marka sigur á Refunum frá Berlín sem var síst of stór. Aðalsteinn segir þetta vera með stærri sigra í sögu liðsins.

„Sennilega eitt af stærstu úrslitunum síðastliðin 10-15 ár. Áttu gott run í kringum aldamót eða 2005-06 þegar þeir komust í undanúrslit í gömlu Evrópukeppninni. Markmiðið, þegar ég kom hingað, var að nálgast toppinn í Evrópukeppninni,“ sagði Aðalsteinn.

Óðinn Þór klikkaði á sínu fyrsta skoti í leiknum en skoraði úr næstu 15 og var langmarkahæsti leikmaður vallarins.

„Ég horfði á leikinn aftur og hann var eiginlega betri í sjónvarpinu en á vellinum. Þetta er eins og mánudagur, þegar hann deliverar svona. Klikkaði á fyrsta skotinu og maður var strax svekktur út í hann. Hvernig datt honum í hug að klikka,“ sagði þjálfarinn kíminn. 

Aðalsteinn segir Óðinn Þór frábæran leikmann sem geti náð eins langt og hann vill.

„Hann er í topp tíu í sinni stöðu í heiminum. Vissulega er alltaf hægt að bæta eitthvað og finna hárið í súpunni ef maður er að leita að því. Hans kostir og hugarfar á vellinum eru frábær. Meiriháttar að vinna með honum. Frábær leikmaður, frábær einstaklingur og frábær karakter.“

„Honum standa allar dyr opnar í framtíðinni. Held það sé ekkert þak á hans frammistöðu og því sem hann getur náð.“

Það var kómískt atvik eftir leik þegar markvörður Kadetten var valinn maður leiksins. Sá vildi ekki sjá verðlaunin og afhenti þau Óðni Þór.

„Honum finnst nú gaman að láta hrósa sér líka. Frábær markmaður og frábær náungi. Hann vill að Óðinn framlengi hjá Kadetten, held það sé þess vegna sem hann sé að reyna strjúka honum eins og hann getur í von um að halda Óðni hér áfram,“ sagði Aðalsteinn að endingu.